Tualcheng an chak awlsam

CYMA leh Mizoram Volleyball Association (MVA) te buatsaih LBS Suzuki Avenis, 24th Inter Branch YMA Volleyball Tournament 2026 chu August ni 5, Nilaini khan R Dengthuama Hall-ah khelh chhunzawm a ni, mipa lamah inkhel 10 awmin, hmeichhe lamah inkhel pathum a awm. Mipa lamah inkhelah Tualcheng in awlsam takin hnehna an chang a, set hloh lovin Armed Veng South an hneh.
Mipa lama inkhel hnuhnung berah Mizoram hmarchhak lama awm Tualcheng in Aizawl chhuahlam veng Armed Veng South an hmachhawn. Tualcheng hian Aizawl Veng lakah an khel tha viau a, set thum an khelh chhungin harsatna lian an tawk lo.
Tualcheng hian point 5 a sang fal chungin set khatna an la. Set hnihnaah an khel tha leh zual a, an khingpuite hi point 10 bak an pe duh lo. Awlsam taka st hnihna an lak hnuin set thumna tir lamah an inthlahdah a, Armed Veng South in hma an hruai fal char char. Set hloh thei dinhmuna an din hnuin an insiamtha a, an tangmar thar leh. An khingpui ten point 20 chuang an hmuh tawh laiin an lehpel leh ta mai a, an deu zak zak hnuin set an la nawn leh. Tualcheng hian Armed Veng South lakah 25-20, 25-10, 28-26 in hnehna an chang a, Hunthar laka fiahna hmachhawn turin second round an lut.
Tualcheng hi Pool D-ah Volleyball a hnuhma nei tha tak Hunthar nen an awm tlang. YMA Volleyball 2024-a finalist Hunthar hi first round-ah an bye a, Tualcheng leh Armed Veng South te inkhela chak zawk zawk an hmachhawn dawn. Hunthar leh Armed Veng South hnehtu Tualcheng hi Zirtawpni zing dar 9:30-ah an inhmachhawn dawn.
YMA Volleyball a hnuhma nei tha ber Hunthar hian Tualcheng hnehin third round luh ngei an tum dawn a, vawi khat chauh khela tla nghal turin an inbuatsaih lo. Hetihlai hian Volleyball thiam khua, coach tha ruaia inbuatsaihna tha tak nena inlan Tualcheng hian Hunthar hmachhawn hi an hlau hauh lova, an phur zawk teh tlat. Inlehthalna lian thlentir a, Hunthar Veng hi Suahdur dawntir nghal ngei an tum a, Hunthar hneh turin an inring tawk hle. Tualcheng leh Hunthar te inkhel tur hi inkhel hmuhnawm tak a nih ngei a rinawm.
Inelna neih mekah Thawhlehni khan Tualcheng khaw thenawm Pamchungin hnehna an lo chang tawh a, Nilainiah Tualchengin hnehna an chan bakah an khaw thenawm Rabung Vengthlangin hnehna an chang ve bawk. Rabung Vengthlang hian an khingpui Lawipu Br. chu 25-16, 25-11, 24-26, 25-19 a hnehin second round an lut.
Nilaini a inkhel dangah Durtlang ‘N’ Br in an khingpui Tlungvel Venghlun Br chu 3-1 in an hneh a, Sihphir Br in Chhingchhip Mualpui Br chu 3-1 in an hneh ve bawk. Nilaini a hnehna chang zingah hian Bethlehem Vengthlang, Hlimen, Dengsur, Buarpui, Nursery Veng leh Luangmual te an tel.
Nilaini hian hmeichhe lamah inkhel pathum a awm. Inkhel pathum awma hnehna chang pathumte hian set hloh lovin hnehna an chang vek. Nilaini hian hmeichhe lamah Dawrpui Vengthar, Vaivakawn
leh Bungkawn ten hnehna an chang.