Tualchhung kuhva certify zel dawn

Mizorama kuhva chingtuten an kuhva rah hralh kawngah harsatna an tawh lohna turin sawrkar chuan certify zel turin a ti.
Home department thuchhuak chuan, ram dang atanga dan phal loha kuhva rah lakluh a awm thin avangin Mizorama kuhva chingtuten an kuhva rah hralh kawngah harsatna an tawk tih hria in, a sutkian nan hma an la tih a sawi.
‘Kuhva rah hi Mizoram tualchhunga thar ngei a ni tih certify theitu atan kuhva ching tamna district – Aizawl, Kolasib leh Mamitah certifying officer ruat an ni a, https://home.mizoram.gov.in/qms atangin download theih a ni,’ a ti. Notification-ah hian certificate of origin pekchhuah dan leh he certificate hman dan tur inkaihhruaina siam a ni.
Certificate dilna chu kuhva rah chingtuten anmahni chinna hmun huamtu certifying officer-te hnena thehluh tur a ni, tiin, certifying officer /staff ten dilna an dawn atanga hun remchang hmasa berah a hmunah, kuhva chingtu awm lai ngeiin endik (on-site verification) tur a ni tih a sawi.
‘Certificate an pekchhuahte hi vawikhat hralhchhuahna atan chauh a hman theih a ni a. Certificate of origin nei lo kuhva rah phurhte chu ram pawn atanga lakluh anga ngaih tur a ni anga, man theih a ni ang. Certificate-te hi a dik loa hman a awm tih hriat a nih chuan certificate neitu chu criminal case siamsak theih a ni ang,’ thuchhuah chuan a ti.
He hmalakna hi Mizorama kuhva rah chingtute tan mai niloin checkgate-a duty leh dan kengkawhtute tan remchan zawkna a nih ngei a beisei tih a sawi bawk.