Tualthihna chhuichian thuai phut

Tualthihna chhuichian thuai phut
Mamit district-a Bungthuam mi tualthihna thlen dan chu thuneituten chhuichhuak thuai a, pawikhawihtu hremna pe ngei turin an phut tih Bungthuam YMA chuan an sawi.
YMA Bungthuam Branch thuchhuah chuan, 2025 February 12 zana thia hmuh, an member Lalfakmawia (59) tualthihna chu pawi an ti a. A tualthihnaa inhnamhnawih zawng zawng a rang thei ang bera chhuichhuak a, a na thei ang bera hremna pe turin thuneitute an phut tih a sawi.
Thudawn danin, Lalfakmawia (56), Bungthuam hi an khuaah ZPM Unit treasurer a ni a, village council inthlan ni – Feburary 12 zan khan, dar 10 velah vote chhiar ngaichang turin a chhuak dawn tih a chhungte a hrilh a, a haw tak loh avangin February 13 khan a nupuiin an Branch YMA hruaitute a hriattir a ni.
YMA hian hma lak dan tur an rel lai mekin, hemi ni chawhnu dar 2.30 vel khan luia kal naupang hoin Bungthuam atanga km.3 vela hla, Bungthuam leh Luimawi inkara luiah ruang an hmuh thu hriat a ni a. Lalfakmawia hi a ni tih finfiah a ni. A lu ah hliam a tuar nual a, a nghawngah nghet takin gamchha a insuih nia sawi a ni. T shirt leh kekawrte chiah a inbel a, hemi ni vek hian Thinghlun kawngah a thawmhnaw hi a bike hmuh a ni. A thawmhnaw leh bike an hmuhna hi a ruang hmuhna atang chuan a hla viau tih sawi a ni.
Lalfakmawia thihna chungchangah hian Kanhmun Police Station-ah thubuai thehluh a ni a, chhui mek a ni tih thudawnna chuan a sawi. Pawikhawihtu ni ngei tur la chiang chiah lo mah se, thu zawhfiah atana lak an nei nual tawh a ni.