Tui a fim tak tak thei rih lo

Aizawl mipuite tui tlan Tlawng lui a nu a, a fim tak tak thei rih lo. Tui an pump theih lai pawhin a fim tak tak chuang lo.
PHE department hotute chuan Tlawng lui hi tun hnaiah a fim tak tak thei lo tih an sawi a, a zia deuh lai pawhin a nu viau tho an ti. A zia deuh lai a awm a, rei lo teah a nu leh thut thin an ti bawk.
June ni 8-ah khan Tlawng lui hi a nut em avangin tui pawh lak (pump) chi-ah an ngai lo a, ni 8 leh ni 9-ah khan tui an la lo. Chumi hnuah chuan an la ta a, mahse a nu viau tho. A nu chungin an pump a, tui mamawhna a san avangin an pump lo thei lo tih an sawi.
Tui fim lam tehkhawng hi NTU (Nephelometric Turbidity unit) an ti a, NTU 5 hnuai lam hi mipui hnena sem tlakah ngaih a ni. PHE department hotute chuan Tlawng lui hi a pangngaiah chuan NTU 100 te a ni thin a, lui tuiah chuan hei hi a fim tih an sawi. NTU 100 emaw a aia sang pawh ni se an pump hnuah sem tlak turin an tifim thin a, mahse tihfim rual loh khawpin tun hnaiah a nu ta fo a ni an ti.
June ni 8 leh ni 9 hnuah tui hi an la a, NTU 500 te a nih thu leh, a fim deuh lai pawhin NTU 300 te a nih thu an sawi a, chung chu an tifim thin tih an sawi. Mahse tui hi a nu leh thut thin tih an sawi a, June ni 13 khan NTU 900 te a ni leh a, zan lamah chuan NTU 400 velah a tla tih an sawi.
June ni 8 leh ni 9-a an pump loh khan NTU 900 a kai a, a tehnaah hian NTU 1000 thleng a awm thu leh, teh phak loh khawpa nu NTU 1000 chuang a nih fo thu te an sawi.
Tui a nut hian tui an lak loh avanga harsatna ringawt ni lovin khawl a tihbuai avangin harsatna a awm thin tih an sawi a, tunah pawh Greater Aizawl Water Supply Scheme Phase I leh Phase II-ah treatment plant leh jackwell-ahte chirh leh bawlhhlawh a tam thu, chumi tihfai chu thil hautak a nih thu te an sawi.
PHE department hotute chuan tui hi a nut pawhin a theih hram chuan pump a ngai a, chuvang chuan tunlai pawh hian tui an pump tih an sawi a, thil a kal tluang tia sawi ngam a nih loh thu, a zia deuh lai pawha a nut leh vak thin thu te an sawi.