Tui a nu, tui lak hna la buai bawk

Aizawl tui tlan Tlawng lui a nu a, nu lo pawh ni se tui lak hna a buai rih – a lak hna hi buai lo pawh ni se tui a nu hle.
Remal cyclone leh a ruah kenin Mizoram a nuai avangin kar hmasa khan Tlawng lui hi a lian a, tuilian hian tui lakna hmun a chim bakah khawl a tichhiain a len bo nasa bawk. Hei hian Aizawl a nghawng zui mek.
PHE department hotute chuan tui hi a hma anga tluang taka pump theih pawh lo ni ta se tuilen hnuah tui a nu lutuk a, a hma angin thil a kal tluang chuang lo ang an ti.
Tui an pump hian mihring in tur leh hman tur a nih avangin tihfim a ngai thin a, an sawi danin NTU (Nephelometric Turbidity unit) 5 hnuai nihtir tumin an tifim thin. Tun hnaia Tlawng lui len hnuah NTU 1083 te a kai a, tifim tura beih fe ngai tur khawp a ni.
A nut em avang hian NTU 5 hnuaia dah turin bawlhlo hman nasat a ngaih bakah hun a duh rei a, chuvangin a hmaa ni khata an pump zat pump thei pawh ni se a tihfim chhung (treatment process) a rei dawn avangin mipui hnena sem tur chuan hun a duh rei tho ang an ti.
PHE department hian Tlawng tui lak hna hi Greater Aizawl Water Supply Scheme (GAWSS) Phase I leh Phase II hmangin an thawk a, tuilianin a tihbuai avangin tun hnaiah generator hmangin an pump. Kar hmasa Zirtawp zan atang khan Phase II hnuaiah generator hmangin an pump a, ni khatah tui litre maktaduai 8 vel a pump theih. Mahse tui litre maktaduai 8 hi eng tham a ni lo.
Chawlhkar khat chhungin Phase II hmangin a hmaa an pump thin zat kha pump theih an inbeisei a, tuilen atanga chhutin Thawhlehni velah hi chuan hei hi an puitlin theih an beisei.
Phase II-ah hian ni khatah tui litre maktaduai 18 te, litre maktaduai 19 te a pump theih. Phase I hmanga pump theih hun tur a hriat rih loh a, tun kar chhunga diesel hmanga pump theih beiseina chu a awm.
PHE department hotute chuan rin phak bakin tuilian hian an khawl a tichhe nasa tih an sawi a, a chhiat dan pawh hi hriat fiah tak tak a la ni lo zawk tih an sawi. Khawl a tihchhiat bakah tuilian hian khawl engemaw zat a la a, spare part engemaw zat a la a, chuvangin thlak ngai pawh thlak zung zung theih a ni lo tih an sawi.
Phase I leh Phase II hmanga ni khata tui litre maktaduai 30 te an pump tlinin Aizawl mipuiin tui an harsa lovah an ngai thin a, tunah erawh litre maktduai 30 chu a la hla!
An pump ang angte pawh hi a mamawh zual hnena pek a ngaih thu an sawi a, damdawi in leh ngaih pawimawh ngaite ngaih pawimawh a tul thu PHE department hotute chuan an sawi.