Tui in tur lakna leh plastic um ruak paihna khawl dah thar

Aizawl Smart City hmalaknaa Aizawl khawpui hmun engemawzata man chawia tui in tur thianghlim dawhna ‘Roadside Drinking Water Kiosk’ leh hmankhat daih plastic tui um tih riralna ‘Reverse Vending Machine’ an dahte mipui hnena hlanna chu Nilaini khan neih niin, MINECO Main Gate kawta heng khawl pahnih dah hi deputy chief minister Tawnluia’n a hawng.
Remchanna changkang tak, mipuiin an chhawr tangkai theih tur ruahman a ni tih deputy chief minister hian sawini, Reverse Vending Machine phei chu tui inna plastic um ruak miin an paih mai mai thin senghawi leh sawngbawlna kawngah min pui theiin a ring tih a sawi a. Mipuiin kan hman tangkai chuan khawpui faina leh thianghlimna kawngah hma kan sawnna a ni thei dawn tih a sawi a ni.
Man chawia tui in tur thianghlim dawhna khawl hi Aizawl veng hrang hrang leh hmun pawimawh tiamin hmun 24-ah bun a ni a. Cheng khat thirin tui ml 500 leh cheng hnih thirin tui litre khat a lei theih a, a tui hi UV filteration hmanga he khawl chhunga awm khawl hrang hrang pathumin a tihfai hnua lo chhuak a ni. He khawl hian vawikhatah tui litre 120 a khawl thei a, a sirah LED display a awm a ni.
Hmankhat daih plastic tui um ruak tihriralna hi Aizawl veng hrang hrang leh hmun pawimawh tiamin hmun 17-ah dah a ni a. Bur ruak nawrhluhna awmin, bur ruak chu khawlin a chhungah a chep nawi a ni. Bur ruak nawrluh hnuin coupon hman tangkai theih a rawn chhuak thei dawn a. Bur ruak gram 80 aia rit chu khawlin a lalut loa, a rawn nawrchhuak a. Plastic a cheh nawi hi bawlhlawh sawngbawl pawl – ‘No Waste’ in kg khat cheng 5 zelin an lei dawn a ni. Tum khata plastic cheh nawi kg.20 khawl theiin a sirah LED display a awm a ni.
Aizawl Smart City-in a ruahman tho, kawngsira chawhmeh zuarte tan dawhkan siamsak ‘Street Vendors Modular Kiosks’ 94 siam pawh deputy chief minister hian a hmangtute hnenah a hlan nghal a. Steel tha chi leh darthlalanga siam niin, pawhdawh kalh theih a ni.