Tui lian vangin Pakistan-ah mi nuai 2.5 vel baihvaiin awm

Pakistan-a mihring cheng an tamna ber, Punjab province-a ruah nasa tak sur avanga lui pathum lian avang leh an thenawm, India-in tuikhuah a sah avang tui a lian nasa hle a, mi 2,50,000 dawn baihvaia awmin mi maktaduai khat chuangin an tuar.
Chhanchhuah hna thawktute chuan Ningani khan tui lianin a dante chhanchhuah tumin lawngleng nen an la bei nasa hle a. Thlai leh sumdawnna hmun tam tak a chhia a, mi tam tak chhuak thei lovin an tang bawk.
Nilaini khan Gujranwala district leh a chhehvel khuaah mi 15 vel an thi niin police-in an sawi a. Khawchin zirtute chuan Inrinni leh Pathiannia ruah a han deuh hnuah kar thar atangin a ruah a sur leh dawn niin an sawi lawk.
Punjab province Minister Marriyum Aurangzeb chuan Ravi, Sutlej leh Chenab lui lian avangin khaw 1,432 an buai tih sawiin mi maktaduai 1.2 chuangin tuarin mi 2,48,000 insaseng ngaiin an awm tih a sawi.
Relief camp 700 dawn leh medical camp 265 an siam a, ei tur leh mamawh dangte pek an ni tih a sawi.
June thla tawp atang khan Pakistan-ah hian tui lian avangin mi 800 chuang an thi tawh.
Prime Minister Shehbaz Sharif-a chuan Pakistan hi ‘khawvela khuarel chhiatna tuar nasa thei ber tur zinga mi’ a nih thu leh sik leh sain a nghawng nat ber ram 10 zingah a tel tih a sawi.
Pakistan-ah hian kum 38 hnua Ravi, Sutlej leh Chenab lui a len nasat ber tum niin district hrang hrangah chhanchhuah hna thawh a ni tih irrigation department chuan a sawi.
Punjab province-ah hian kum dang zawng aia fur ruah a tam avang leh India-in a tuikhuah a sah dawn tih a hrilh lawk avangin kar tir atang khan mi chengte an insaseng tan.
Punjab Chief Minister Maryam Nawaz Sharif-i chuan ‘a hun taka insaseng’ a nih avangin nunna tam tak an chhan him niin a sawi a. Thuneituten kum tam tak hnua tui lian an tawrh nat ber tia an sawiah hian inbuatsaihna leh dan lova thil din an tihchhiat tam hman avangin chhiatna lian tak thleng tur an pumpelh phah niin a sawi bawk.
Pakistani Planning Minister Ahsan Iqbal-a chuan Ningani khan tui lenna, Narowal khawpui tlawhin India-in a hun lova tuikhuah a sah avangin an tuar tih a sawi a. New Delhi chuan an awp chin Kashmir-a khualzin 26 thah a nih avanga water treaty an siam an hman rih loh chu a bawhchhia niin a sawi.
Narowal-a tui lian Guru Nanak-a hmun thianghlim, Indian ramri bula awm pawh a chim a; mahse, thawktu leh biakzinte erawh hmun himah saseng hman an ni.
Kum 2022 khan Pakistan hian tui lian nasa tak tuarin mi 1,700 dawn an lo thi tawh.