Tui tinutu chunga action lak phut

Environment humhalhtu pawl pakhat Centre for Environment and Social Justice (CESJ) chuan, NHIDCL kawng laihna leivung thehthang dan dik loh vanga Mizorama lui thenkhat chu bawlhhlawh ta leh, chumi avanga mipui harsatna thleng ta nia an hriat thu te, hetianga lui tui tinutu hi chhui chhuah a nih a, dan anga an chunga action lak a nih theih nan, Chief Judicial Magistrate hnenah chhui phalna an dil dawn tih an sawi a.
Kan hriat angin, khua a kheng a, lui tui a tlem avangin tui pump khawp a awm lo tep a, tui lamah harsatna nasa tak a thleng a. Ruah a han sur a, lui tui pump tur a awm dawn e tiin mipui an lawm a, tui tam mah se, thlitfim theih loh khawpa a bawlhhlawh vang leh a nut nasat vangin a pump theih loh leh a.
Tunhma zawng zawng khan furpuiah lui tui a nu ve tho thin, mahse thlitfim theih loh khawpa a bawlhhlawh leh a nut nasat hi a awm ngai lo a tih theih awm e. Tun hnuah hian, kawng laihna leivung paih dan a dik loh avangin environment nasa taka suasam a nih bakah, heng kawng laihna leivungte hi kawr ruamah dik lo taka thehthang a nih avangin ruahtuiin lui lian zawkah a len lut a, kan tui tlan mek lui tam tak chu mihring tlan atana thlitfim theih lohvin a lo bawlhhlawh zo ta a.
Hei hi mipui tam zawk harsatna thlentu a nih avang leh, he thil thleng hi dan bawhchhiatna lian tak nia a lan bawk avang hian thil serious tak a ni a. Thuneitute pawhin hetiang thil, mipui harsatna nasa tak thlentu hi a chhan leh vang chhui a, a tul anga dan anga action lak a nih theih nana hma an lak hi a pawimawh dawn hle a. Dan kalha thiltihna a thlen mai piah lamah, mipui harsatna thlentu, mihring nunna hnar ber tihchingpenna a nih avangin tun hnua hetiang thil hi a thlen tawh loh nan dik lo taka thil titu an awm a nih chuan zawn chhuah ngei chu tihmakmawh a ni awm e. Dan bawhchhiatah pawh, nasa taka mipui tawrhna thlen zuina thil a nih avang hian ngaih serious hle a ngai a ni.