Tuialhthei a leina, Venezuela president-in India tlawh mek

Venezuela-a president nihna chelh lailawktu, Delcy Rodriguez-i chuan Nilaini khan India thlengin Pathianni thleng a cham dawn tih Indian foreign ministry chuan a sawi a, New Delhi-in Caracas atanga tuialhthei thlitfim loh a lak luh a tihpun mek laia tlawh a ni.
India hi May thlaa Venezuela atanga tuialhthei la lut tam pahnihna a ni a, ni khatah barrel 4,27,000 a lei a, US hnuaiah a awm niin Reuters chuan a tar lang a. India-a Reliance Industries chu tun hnai thla eng emaw zat chhunga Venezuelan tuialhthei thlitfim loh lei tam pathum zingah a tel a ni.
A tlawh chhungin Rodriguez-i hian Indian Prime Minister Narendra Modi-a nen an inbe dawn tih Indian foreign ministry thupuangtu, Randhir Jaiswal chuan thuthar lakhawmtute hnenah a sawi.
Jaiswal-a chuan, “Inkawmnaah hian India leh Venezuela inlaichinna zawng zawng sawi a ni dawn a. Energy, sumdawnna, investment, damdawi lam, transportation leh renewable energy lama thawhhona tha zawk neih theihna tur kawng hrang hrang a tel dawn a ni,” a ti.
Sumdawnna khawpui, Mumbai-ah pawh Indian energy industry-a mi langsante a kawm ngei rin a ni bawk.
Rodriguez-i hian India a tlawh hnuhnun ber chu February, 2025 kha niin Venezuelan oil minister a nih lai a ni a, India Energy Week conference-a tel palaite a kaihruai bawk.
Tun tuma zin hi khawvela tuialhthei la lut tam leh hmangtu tam ber pathumna, India-in Iran leh US-Israel indona avanga lak luhnaa buai a hmachhawn mek lai a ni a, indona avang hian Asian chhim lam ramin tuialhthei thlitfim loh a lak luh zinga 40% aia tam phurna kawngpui, Strait of Hormuz chu khar ta a ni.
India hian nikum khan Venezuelan tuialhthei lei a lo titawp tawh a, US President Donald Trump-a’n South American ram atanga a lei ramte chunga 25% chhiah a laksak vang a ni a. February thlaa Washington leh Caracas inkara oil supply pact siam a nih hnua hrekna tihziaawm a nih khan a lei chhunzawm leh a ni.
January thlaa US-in President Nicolas Maduro-a a man hnua inremna siam hnuaiah hian Washington hian Venezuelan tuialhthei hralh atanga sum hmuh chu Treasury Department-in a enkawl bank account hmangin a thunun a, sumdawnna lam hawi pawhin a kaihhruaina a zawm a ni.