Minister hlui, Siaha bialtu MLA Dr K Beichhua hawi
lam tur a la hriat loh a, politics ngaihvente chuan rin dan chu an nei thiam ang. “Tuihnuailawngah ka la chuang mek,” amah chuan a ti.
Nikum kum tawp lamah Dr Beichhua hi minister of state a nihna atanga chawlhtir a ni a, kumin kum tir lamah party atanga chawlhtir a ni. Independent MLA a ni ta a, party zawm a la nei lo.
“Term tawpah, election puan hnuah ka hawina lam chu a chiang ang a, ka kalna tur lamah election puan hunah ka kal ang,” Dr K Beichhua chuan a ti.
“MLA nih leh ka tum a, kum tawp inthlanah din leh ngei ka tum. Chumi tur chuan a theih ang angin ka inbuatsaih,” a ti bawk.
MNF atanga chawlhtir a nihin Siaha district-ah MNF atangin mi engemaw zatin an zui a, a tam zawk chu BJP-ah an lut. ZPM-a lut an awm bawk.
Kum tawp lamah party zawm a tum thu a sawi a, MNF atangin zuitu a nei leh dawn nia sawiin, a zat erawh sawi lawk theih a nih loh thu a sawi. MNF atanga a chhuah hlima amah zuichhuaktute pawh an vai chuan a chang lo ang tih a sawi a, party hrang hrangah an lut ang a, mahse a tam ber nen chuan an inzui zel ang tiin a sawi. Dr Beichhua hi tun hnaiah Delhi-ah a zin a, ni 20 vel a cham. National party hruaitute a kawm kual nia hriat a ni.
A bial, Siaha biala ding turin Congress party-in nikum lamah daih tawh khan N Chakhai an puang tawh a, chuvangin Dr Beichhua hi Congress-ah a lut lo ang tih a chiangah ngaih a ni. ZPM-in bial vil tur leh candidate tur an puan tawhah MLA bial hnih awmna Siaha district chiah hi a la tel lo a, mahse Dr Beichhua hian ZPM a zawm a rinawm chuang lo tih thu dawn a ni. BJP-in candidate tur an la nei lo a, BJP hi Siaha district-a party lian an ni.
Tuihnuailawngah ka chuang mek: Dr K Beichhua
Get real time updates directly on you device, subscribe now.