Manipur buaina avangin Mizoramah sahimna zawnga tlanchhia mi 11,785 an awm mek a. Mizorama tlanchhia leh Manipur-a hmun him china awm, mahni in leh lo chhuahsan Zohnahthlakte ei turin Mizoram sawrkar chuan buhfai quintal 2,388.50 a pechhuak tawh.
Chief minister Zoramthanga’n twitter lama a tarlan danin, state thenawma buaina avanga mahni in lum chhuahsana tlanchhiate tan chhawmdawlna hna Mizoram sawrkarin a thawk mek zel tih sawiin, “Kan ngah lem lo naa, peizawn zel erawh kan inhuam a ni,” a ti.
June 19 thlenga chhinchhiah chinah, Mizorama sahimna zawnga Manipur atanga tlan lut hi mi 11,785 an ni a, district 11-ah an insem darh a. Sawrkar emaw khawtlangin emaw relief camp 35 an siamah mi 2,883 awmin, chhungkhatna laina bel leh mahni remchan dan anga awm rih 8902 an ni.
Mizoramah hian tun dinhmunah Myanmar, Bangladesh leh Manipur-a buaina avanga sahimna zawnga tlanlut mi 50,000 chuang Mizoramin a mikhual mek a ni.
Mizoram chu Zohnahthlak tan a ni emaw, Zohnahthlak ni lo pawh ram dan zawm theitu eng hnam tan pawh hmun ralmuang, thlamuang taka an awm theihna leh awm mekna a ni tih chief minister Zoramthanga chuan sawiin, chutiang bawkin Manipur pawh Zohnahthlak, tha taka ram dan zawmtute tan hmun ralmuang ni ve se a duh tih a sawi bawk.
Manipur atangin sahimna zawng 11,785 awm mek
Get real time updates directly on you device, subscribe now.