Tuikhur tih thiang-hlimna siam

Tuikhur tih thiang-hlimna siam
Aizawl Municipal Corporation leh Ward No. XVII corporator David Zohmangaiha hmalaknaa siam Republic Veng Lungli tui Water Treatment Plant chu September 15 khan Rajya Sabha MP K Vanlalvena chuan a hawng a. Aizawl deputy mayor R Thanglura’n a telpui bawk.
MP chuan AMC, bialtu corporator leh Society member-te thahnemngaihna luangkhawm kaltlanga Lungli tui tih thianghlim leh sawngbawlna tha peihfel a ni chu lawmawm a tih thu a sawi a. Tui tih thianghlim leh hrisel bakah a sem chhuahna thlenga mumal taka ruahman lawk a ni chu finthlak a tih thu a sawi.
Lungli Water Treatment Plant siam nan hian Rs. 14,00,000 sen a ni a. He tuikhur hi mihring in leh hman atana thianghlim reng tura duan a ni.
Lungli Tuikhur tuihna humhalh hi 1996 March 4 atanga tan tawh a ni a. Tui tlantuten mumal taka tui thianghlim leh hrisel, mahni chenna in theuha an lakluh a, an tlan theih nan hma lak niin, ‘Lungli Tui Tlan Society’ din a ni. Society member hi chhungkaw 232 vel an ni mek a, a hnathawhna huam chin hi – Republic Venghlun, Upper Republic leh Mission Veng a ni. Society hian inkaihhruaina dan mumal tak a nei a, viltu ruaiin tui haw dan tur bithliah ruahman a ni. Member-te atanga kum tin member fee Rs. 250 khawn atangin tul angtea hma lak thin a ni.