Tuikual lui dungzui in kawngpui siam tum

UD& PA department kaltlangin Tuikual lui dungzuiin motor kawngpui siam tum a ni a. Detail survey neih thuai a ni ang.
Inrinni khan Aizawl West-II bialtu MLA, minister Lalnghinglova Hmar hoin UD&PA hotute leh khawtlang hruaitute chuan cheng vaibelchhe 20 senga he kawng siam tum ‘Aizawl West Outlet’ project hmunhma an enfiah a, inrawnkhawm zui a ni.
Minister chuan Aizawl West-II huamchhunga hmun pawimawh tak, Tuikual lui kama motor kawngpui siam chu hun rei tawh tak atanga Aizawl West-II mipui vei leh beisei a ni, tiin, kawngpui chu kawtkai chhuahna remchang leh hnai a ni dawn a; rikrum thil, chhiatni thatni, faina leh hriselna, bawlhhlawh sawngbawl leh nitin khawsak kawngah mipui tan a tangkai dawn bakah zawhfel a nih hun chuan Aizawl khawpui thenkhat traffic jam pawhin a ziaawm phah thei dawn tih a sawi a ni.
Inrawnkhawmah hian motor kawngpui kalna tur detail survey neih thuai nise, am ti a. Dinthar Veng chhunga luikama ram neituten kawngpui siam nan an ram chin engemawzat an pe phal chu thil lawmawm tak a nih thu sawi a ni. Kawng chu mipui hman tangkai tur leh an ta tur a nih angin, Tuikual North leh Tuikual South huamchhung lui kama ram neite pawh hemi chungchang hi sawipui nise tih a ni a. Tuikual lui kam lehlama Assam Rifles ram chin hrechiang turin Land Revenue & Settlement department hotute thawhpui nise, a tul chuan Assam Rifles hotute nen a hmuna enfiah nise an ti.
Aizawl West Outlet project atan hian Special Assistance to States for Capital Investment (SASCI) scheme hnuaiah UD&PA department chuan cheng vaibelchhe 20 a sanction tawh a ni.