Tuimuk luidung tifaiin hnatlang

Tuimuk luidung tifaiin hnatlang
YMA Khawzawl Vengthar Branch-in Tuimuk lui din thar lehna a kalpui mekah Inrinni khan he luidung thianfai hian an hnatlang a, YMA member bakah nu leh pa leh naupang 150 chuang an thawkchhuak.
Hnatlang neih hmaa hun hmanah Khawzawl PHE WATSAN Division EE Liantluanga Chohte chuan, luidung humhalh a, fai taka kan enkawl rualin, a hnar lam, catchment area-ah tui a awm reng theihna tura hma lak ngaihpawimawh tel a tul tih a sawi a. Lui hnar lam ngaihpawimawh loh chuan luidung fai deuh, tui awm si lo kan neih a hlauhawm, tiin, tui hnarte a kum telin a kang zel avangin tui hna a lo that leh theihna’n kumina thingphun hunah thing pakhat tal phun nun tum turin a chah.
“Nikum March 7 khan Tlawng luiah tui litre maktaduai 121 a luan laiin, kumin March 6 khan tui luang hi litre maktaduai 58-ah a tlahniam a, May 5 khan litre maktaduai 53-ah a tlahniam leh. Tlawng lui hi luite hrang hrangin a fin a ni a, chuvangin Tlawng lui a kam a nih chuan luite hrang hrang a kam tihna a ni,” Er. Liantluanga Chohte hian a ti a. Khawzawl khawpui tui tlan Tuichang pawh a chawmtu leh lui hnar, lui te zawk te an ven loh chuan hun reilote-ah a tlem thuai dawn tih a sawi a ni.
Kuminah national highway kawng laih vangin Tuichang hnarah leivung a tam a, furpui a lo thlen hunah tui a nu dawn tih PHE hotu hian a sawi. Tunhnai lawka ruah tlem tlaah pawh tui a nu hle a, tih fim hleihtheih loh khawp a ni nghal tih a sawi. Ruahtui khawl ngaihpawimawh a tul tih a sawi bawk.
YMA Khawzawl Vengthar Branch hian 2022 November 19 khan “Tuimuk lui dinthar lehna (A che che seh hlawkah)” tih a kalpui tan a. Luidungah sangha leh luisa dangte a pun leh theihna’n YMA member-te chu section angin an in-duty chhawk a, Krismas leh kumthar vuakvetah pawh chhunzan zawmin an duty a. Humhalh tan tirha sangha note an chhuahte pawh tunah chuan hmuh theihin a awm ve tan tawh tih an sawi a ni.