LS MP-in Army Chief leh MP-te sawipui
Mizoram Lok Sabha MP C Lalrosanga chuan Inrinni khan Chief of the Army Staff Gen. Manoj Pande phone-a biain Manipur-a thil awmdan a sawipui a. Manipur buainaa sipaite chetvelnaah mipui, a bikin tlangmite rin hlawh zawnga boruak siam turin sipai hotuluber hi a ngen. Boruak tha siam zawnga tlangmite laka an chet theihna’n hma la turin a ngen bawk.
Army Chief chuan mipui rin hlawh zawnga che tura sipai hotute a hriattir tur thuin MP chu a chhang a ni.
Mizoram MP hian Manipur buaina chungchangah a thawhpui hmarchhak MP-te hmalakpuiah sawmin buaina tuartute hmun him lama thiarchhuah leh enkawl dan turte a sawipui.
Inner Manipur bialtu MP, Union Minister of State for External Affairs leh Education Dr Ranjan Rajkumar Singh leh Outer Manipur bialtu Dr Lorho Pfoze te nena an inbiaknaah Manipur atanga state dang mi thiarchhuah dan a sawipui a. A bikin Imphal-a CRPF camp-a sahimna zawnga tlanlutte ei leh in pek that a tul thu leh Churachandpur lama kal duhte tana venhimna leh lirthei ngaihtuahsak turin a ngen.
Manipur MP-te chuan theihtawp an chhuah zel tur thu an lo hrilh a. Mizoram MP hian Churachandpur bialtu MLA Paolienlal Haokip nen pawh inbiain, hma lak zel dan sawidun tura Aizawla inhmuh an tum. Manipur atanga Mizoram lama haw duhte tana thlawhna leh lirtheia kalna ruahman chungchang pawh chief minister Zoramthanga biain C Lalrosanga hian a sawipui bawk.
LS MP-in Army Chief leh MP-te sawipui
Get real time updates directly on you device, subscribe now.
Prev Post
Next Post