Tukthuan ei loh chin-in heart attack risk 27%-in tisang thei

Tukthuan ei loh chin-in heart attack risk 27%-in tisang thei
Zanah an mu rei a, zingah an tho tlai a, tukthuan an ei tha hman lo emaw, an ei tha peih lo thin a, ei loh mai mai ching hi khawvel hmun hrang hrangah an tam viau awm e. Mahse, tukthuan ei loh chin hian heart attack (luphuchawl) risk a tisang tih an hmuchhuak niin mithiam ten an sawi.
Mithiam ten kum 16 chhung zirchianna an neih atanga an hmuh dan American Heart Association journal Circulation-a an tarlan danin, mipa tukthuan ei loh ching te chuan heart attack emaw coronary heart disease avanga thih theihna risk 27%-in tha taka tukthuan ei thin te aiin an nei sang zawk niin an sawi. Tukthuan ei loh mai mai ching te chu tlangval an ni duh hle a, mei zuk an awlsam tlangpui a, zu in mai pawh an awlsam duh bik a, kum naupang lam an ni tlangpui niin an sawi.
Chubakah zanrei hnua chaw ei ching te tan pawh risk hi a sang hle a, zanrei hnua chaw ei thin te chuan a ei ve lo te aiin coronary heart disease risk hi 55%-in an nei sang zawk niin an sawi.
Zirchianna neitu te hian mipa 26,902, kum 45-82 inkar te chu kum 16 chhung an chhui zui a, chuta tanga an hmuh dan sawiin, he zirchiannaa an hotu Harvard School of Public Health a mi Leah E Cahill chuan,”Tukthuan ei loh mai mai chin hian mi a tithau (obesity) duh a, BP sang a siam duh a, cholesterol a tisangin, diabetes pawh a siam thei a, chung te chuan a rei hnuah heart attack a thlen thei,” a ti.