Thisen pe hnem ber a thi

Thisen pe hnem ber a thi
Australian pa tlawmngai, Guinness World Record-in thisen pe hnem (blood plasma donation) bera an puan, James Harrison chu kum 88 mi niin February ni 17 khan a thi. ‘Man with the golden arm” an tih hial khawpa thisen pe nasa, Harrison hian kum 60 chuang chhungin thisen vawi 1,173 a pe hman a, a thisen pek avang hian nausen maktaduai 2.4 nunna chhanhim niin Associated Press chuan a tarlang.
Harrison hian thil vang tak anti-D antibodies a nei a, hei hi nau pianghlim a hemolytic disease ven nan a pawimawh hle a, Australian Red Cross Blood Service chuan medical khawvel tana a inpekna hi ropui an tih thu an puang hial a ni.
Harrison hi New South Wales-a nursing home-ah a boral niin a tupa, Jarrod Mellowship chuan a puang a ni.
Harrison hi inchiuna hriau hlau chi a ni a, mahse, kum 18 a tlin atangin thisen a pe tan a, kum 81 mi a nih thlengin thisen hi a pe zui ta zel a ni. 2005 khan Guinness World Records chuan khawvela thisen pe ngun berah a puang a, a record hi 2022 khan American donor Brett Cooper-a’n a rawn khum nain, medical khawvel tana Harrison-a hlutna erawh khum theih rual a ni dawn lo.
A thisenah hian antibody vang tak mai anti-D a awm a, chu chu nau piang hlima hemolytic disease venna tur injection siam nan an hmang thin. Nu Rh-negative blood neiin, Rh-positive nau a pai chuan, nu immune system-in a naupai lai red blood cell a bei ta chiam mai thin a ni. Harrison-a thisen pek hian nausen tam tak nunna a chhanhim ta a ni.
Australian Red Cross Blood Service, Lifeblood an tih bawk chuan Harrison hi zahna chibai an buk a, ‘midang te tana luang chhuak nun nei’ tiin an sawi a, midang tana a nun hmangtu an ti bawk. Australia-ah hian anti-D donor hi 200 vel bawr chauh an awm a, an thisen pek hian kum nu leh nau piang 45,000 vel a tanpui thin niin an tarlang bawk.