Tumah thawhpui kan tum lo – ZPM leader

Kumin MLA inthlanah tumah thawhpui an tum loa, BJP phei chu an sawrkarna paih tura theihtawp chhuah zel tur an ni tih ZPM leader Lalduhoma chuan a sawi.Thawhtannia an party office-a inkhawmah ZPM leader chuan kumin MLA inthlanah tumah thawhpui an tum loa, tum pawh ni se midang sawi sak an ngai lo tih a sawi. Delhi chaknaa innghah an tum loa, an innghahna chu Pathian a ni, tiin, tunhnaiah Guwahati-ah thlawkthla a, BJP nen zuk inhmu a, lirthei pakhata chuang hoa anga sawi chu thudik lo nia ngaih theiha sawiin, “Fate buaipuia kan zinna thu hi Congress party ka hrilh zel chhan tur ka hre loa, BJP chungchang an hriat duh chuan an thawhpui MNF hi zawt mai se tih hi ka rawn duh a ni,” a ti.
India rama rei tak Congress sawrkar hnuaia kun ning tawh, ‘kalphung thar’ zuar ve tho Pu Modi duhna lian tak chuan ZNP an nih laiin NDA (National Democratic Alliance) zawm ve tura sawm an nih angin an zawm ve a, Mizoram MP inthlanah pawh Congress ni lo zawng chu candidate khat intawmin an thawk ho tih Lalduhoma hian a sawi a. BJP kal zel danah Kristiante nekchep zawng, Kashmir-in special provision an neih pawh sawinghing a, Yoga chawilarin Pathianni-ah programme an siam ta fo chu Mizo Kristian leh minority-te tan tel reng chi ah an ngai lo a, kum 2016 khan NDA an zawmna an titawp tih a sawi.
NDA an chhuahsan hnu hian, an lo chang ran emaw tih turin MNF hian NDA an zawm ve ta chat niin a sawi a. Vawiin thleng an la tel reng tih a sawi. “Citizenship Amendment Act kha MNF nen kan do tlang a, chutih laiin an MP chuan a thlawp zawngin thu a sawi leh thung si. National party zawm hi keini chuan kan duh tawh loa, tualto party nih mai hi a tawk a, kan ram tan a hlu ber,” a ti. UCC chu MNF party-in sawisel reng siin a tan zawngin vote an thlak leh mai a hlau hle tih sawiin, “Article 371G kan nei a; kan inneih dan, kan inrochun dan zawng zawng hi a danglam vek dawn. Inner Line Regulation hi min paih sak daih loang tih hi tumahin kan sawi thei tawh lo. Jammu & Kashmir pawh khutiang taka an sawisak duh chuan kan him reng bik lo mai ang tih hi thil hlauhthawn awm tak a ni,” a ti.