Tun Krismas Chu

Mizote hun pui, Kristian-te hun pui, khawvel leh thil siam zawng zawngte hun pui, kan nghahhlelh em em chu kan lo thleng dawn hnai leh ta, a va lawmawm em, kan phu lo hle mai. Nikum lam kha chuan State Assembly Member turte thlanna kha kan nei a, tun kumah chuan kan rilru la peng tur thil eng em em kan nei lovin ka hria. Lusun chhungte tan erawh mittui tlakna ni, a ruka mittui hrukna ni a lo ni ve reng bawk a. Chutiang bawkin kum upa leh natna khirh tak tak neite tan chuan a dawt leh ami hi chu kan thleng zo ve tawh lovang a, tihna rilru nen, rilru a pangkhing viau mai thei bawk. A tawp berah chuan he lei hi kan kumhlunna tur a ni lo, tih hi hria ila, hlim takin hmang theuh ila, chu chu Pathian duh dan zawk a ni ang, indawm kun, phur loh, hlauh, ang chi te hi chu a duh dan a ni lo zawk ngei ang.
|halaite – A nghakhlel ber kan nih ka ring, kan nghahhlelh chhan erawh a tlangpui thu in, a huau huau, nawmchen lam hawi a nih ka ring. Hetih lai hian thalai, invawng thianghlim tlat, rinawm tlat, tam tak an awm ve teuh tho a ni.Nia, thalaite tan chuan han invawn up, khun khan taka han hman chu a harsa mai thei, chuvang chuan, programme zangkhai (Light) tak te hi siam ve thin a ni a, kan siam ve ngai lem lo a nih paw’n ngaihtuahna kan sen a hun ve tawh viau awm e. |halai ka nih ve hun zawng hian, zep ta lo mai ila, kei chu intihhlimna hmun lam leh hmanpui tur, tih vel ringawt hian ka khat ve thin. Ka chhungte hian min tawngtai sak fo thin a nih ka ring, chu bawih ata chu vawiinah chuan ka lo fihlim ve leh der tawh mai. A hun lai kha chuan luck lo, michhia, vak vak ni mah ila, tunah chuan ka lawmna leh vanneihna a lo ni ta zawk a ni.
Khawvel Mi-te – Kristian ni ve lo zawng sawina a ni deuh ber a, chutih rual chuan Pathian duh loh zawng kan tih thin leh ti thin te, sim chuang lote sawi nan han hmang ila a tha awm e. Kan ramah chuan tihduhdahna rapthlak tak tak kan hriat thin te kha a awm ve ngai lo, a awm ngai lo mai pawh ni mai lovin, inhmang ngai lo, inkhawm ngai lote chu kan ngainep hle thin, chuvang chuan, Kristian nih hi a nuam em em zawk a ni. Hetih lai hian kan chhungril nun erawh engtin nge a awm aw, a rah chhuah atangin kan hre thei ang. Ringtute kan hlim hlei thei lo, miin kan rawngbawlnate, thilpek kan pek thin te, kan hnathawh te min faka, min chawimawi zel loh chuan.Isuan Pharisai-te tawngtai dan, rawngbawl dan a sawisel chungchangah khan, ti hian a ti, “..nang chu i pindanah lut la, tukverh-te khar vek rawh, tichuan, a ruka hmu thintu che hnenah tawngtai rawh,”a ti. Anni hi chuan an lawmman chu an la zo tawh, nang chuan nakina mi tur chu beisei rawh, tuisik no khat pawh a thlawn lovang, a ti.
Sual A Ngaizam Lo – Mihringte hi chuan kan inchhui a, kan inenchianga, chuta tang chuan, a vawikhat tih sualna chauh a nih hi, hmun dangah hi chuan a fel em em hi, kan inti a, kan ngaizam, pawmzam mai thin, nia, a dik ve viau mai a ni. Thuthlung hlui lamah chuan, zawlnei ropui, Mosia, kan hre viau hlawmin ka ring, a hring a hrana Pathian nen indawr thin an ni. Mahse, a vawikhat tih sual zeuh avang khan Kanan ram kha a lut ve thei ta lo tlat a ni. Davida chungchangah pawh khan kan hmu leh a, Pathianin ka thinlung ang pu mi, a tih ngat kha a ni a, mahse, tih sual ve zeuh avang khan, hremna nasa tak mai a tawk tlat a ni.
Aw le, hengte chu kum tam tak liam tawh a mi alawm, kan ti mai thei, mahse, kha Pathian kha vawiin ami tho hi a ni, dang lam ngai lo a ni. Rawngbawltute, Mizo kristian-te, i inbihchiang teh ang u, ka rilru ngaihtuah, etc. te chiang takin min hmu reng a ni, lansarh duhnate, uannate, chaponate kha.
Vawiinah chuan, khawchhak mifingte, berampute leh Bethlehem bawng inte kan suangtuahnaah a lang uaih uaih ngeiin ka ring, chutih lai chuan nu leh pa lam te chuan kan fapa, fanute kan ngaihtuahin, engtin nge an hman ang, thianghlimna hlauh phah nan, zu in tan nan, ruihhlo tih nan, an lo hmang mai angah, tiin rilru kan lo seng ve ngei hlawm ang. Nia, Setana hian he hun remchang hmang hian mi tam tak a bum leh ngei dawn a ni. Hman dan nuam tak, hlimawm tak, mahse, Isua tel lo chu kan hmang thei, chutih lai chuan hrehawm, hman dan thing, ho tak, Isua tel si chu, kan hmang thei bawk. Amah ang taka siam kan nih avang hian Pathian meuh pawh hian duhthlan theihna kan neih, zalenna hi min zahsak ve hle a ni. Duhthlanna hmang sual, thihna avang hian Pathian hi a lawm lo reng reng, a hnen lama awm vek tur hian min sawm, min nghak reng zawk a ni. Chuvang chuan, tun krismas chu, tih i’n tum tlang teh ang, hlim takin Krismas Chibai vek u le.