Tun kum 31 chhunga Halloween weekend-a box office sum che vel tlem ber tumah ‘Regretting You’ a No.1
Tun kum 31 chhunga Halloween weekend-a box office sum che vel tlem ber tumah ‘Regretting You’ a No.1
Tun weekend kalta kha Halloween weekend-ah chuan tun kum 31 chhunga US cinema hall-a sum chevel chhiat ber tum a ni a, hetiang karah hian Paramount leh Constantin film romance-drama ‘Regretting You’ chuan dollar maktaduai 8.1 la lutin, box office No.1 a ni.
He film hi Colleen Hoover lehkhabu ziah behchhana chan a ni a, Colleen-i thawnthu ziah behchhana film an siam pahnihna niin, a hmasa zawk chu “It Ends With Us” kha niin, he film hi a changtunu Blake Lively leh a changtupa leh director ni bawk Justin Baldoni te court lamah an inkhin zui tak chiam avangin a chanchin a ngah phah hle nghe nge a ni.
Box office ranking hi weekend (Zirtawpni – Pathianni) chhunga US-a cinema hall ticket hralhna sum chevel atanga teha siam thin a ni a, ‘Regretting You’ hian cinema all 3,245 atangin dollar maktaduai 8.1 a la lut thei a, No.1 a ni ta a ni.
Tun weekend kalta kha cinema hall sum chevel a tlem hle a, tun kum 31 (COVID-19 hun lai chhiar tel lovin) chhunga US-a Halloween weekend-a cinema hall sum chevel chhiat ber tum niin, dollar maktaduai 49.8 a tling pha hram a ni. A hmaa Halloween weekend sum chevel tlem ber tum chu 1993 ka niin, dollar maktaduai 49.2 a ni.
‘Regretting You’ hi tun weekend hma kha kar khat chhung cinema hall-ah an lo chhuah tawh a, tihian ni 10 chhungin US-ah dollar maktaduai 27.5 a la lut tling taw a, US pawn lamah, ram hrang hrang 56 atangin dollar maktaduai 23.3 a la lut tawh bawk a, a vaiin dollar maktaduai 50.8 chu a tlin ve tawh tho e.
Box office No.1 hlui Black Phone 2-in dollar maktaduai 8 la lut lehin No.2 a la ni a, he film hian US-ah maktaduai 61.5 la lut tawhin, US pawnah maktaduai 43.3 a la lut tawh bawk.
Kar kalta box office No.1 Japanese manga pic ‘Chainsaw Man – the Movie: Reze Arc’-in dollar maktaduai 6 la lut lehin No.3 a ni a, he film hian ni 10 chhungin US-ah maktaduai 30.8 a la lut tling tawh a, US pawna a lak luh nen chuan maktaduai 139 a tlin ve tawh bawk.
‘Bugonia’-in dollar maktaduai 4.8 la lut lehin No.4 a ni a, Emma Stone leh Jesse Plemons te channa ‘Bugonia’ hian US pawnah maktaduai 5.3 la lut tawh bawkin, a vaiin dollar maktaduai 11.1 a la lut tawh a, beisei a pha lo viau.
‘Back to the Future’ film chu a kum 40 tlin champha lawmnan an tlangzarh nawn leh a, dollar maktaduai 4.7 la lutin No.5 a ni a, he film hian kar 2,105 chhungin dollar maktaduai 221.7 a la lut tling ta a ni.
Box office top 10:
1 Regretting You $8,100,000
2 Black Phone 2 $8,000,000
3 Chainsaw Man — The Movie: Reze Arc $6,000,000
4 Bugonia $4,800,000
5 Back to the Future $4,700,000
6 Springsteen: Deliver Me From Nowhere $3,800,000
7 Tron: Ares $2,800,000
8 Stitch Head $2,100,000
9 Good Fortune $1,400,000
10 One Battle After Another $1,150,000