Tun sawrkarah mipuiin beiseina tisang tawh lo – BJP president

Beiseina sang tak nen mipuiin ZPM an sawrkar tir a, tunah erawh beiseina an tisang thei tawh lo tih BJP Mizoram president Vanlalhmuaka chuan a sawi.
Thawhtannia BJP State office-a inkhawmah Vanlalhmuaka chuan Mizoramah development beisei mipui tam tak an awm a, development erawh kan duh lo tih vote kan thlak danah a langchiang tih a sawi. Kalphung thar hnuaiah beiseina sang tak nei mah se, beiseina erawh kan tisang thei lo tih a chiang tawh a; ZPM sawrkarin thiltha tih an duh mah se, thil tha tih theihna erawh an neilo tih mipuiin kan chiang hle in a lang tih a sawi.
“Sawrkar hmasa anga kum 5 chhunga thiam taka mipui rilru sukthlek mila chhuanlam siama hun an hman leh mai pawh a hlauhawm hle,” a ti.
2023 MLA inthlana BJP manifesto leh 2024 MP inthlan ami chu tih theih vek ni mah se, Mizoram mamawh em em he manifesto hi tih theih a ni lo tih sawiin, “A chhan chu, mipuiin min rin loh vang a ni. Pathian malsawmna dawng tur pawh hian amaha innghat a, amah rinngam a ngai ang hian, central atanga malsawmna tak tak nei tur chuan sawrkar laipuia rinna nghah a ngai,” a ti.
Mizoramah Pu Modi a vakvai hle a, Mara Autonomous District Council ah chiah an lo thleng duh a. Development pawh an dawng zel dawn tih State BJP president hian a sawi a. Mizoram mipui harh a hun a, kalphung thar hnuaiah pawh phunchiarna bawk kan hmu mek tih a sawi. “Pu Modi vahvaihna hi Mizoramah hian duhtawk tir tawh ila, kan beisei development, kan politician kal tawh leh ni mekten a sawia sawi chauha min thlen sak thin ang ni lo, development a taka kan hmuh theih nan BJP kan behchhan a ngai a ni,” a ti.