Tun thlaah lirthei thar sang chuang awm tawh

Aizawl khawpuiah traffic a jam kum tluan a, lirthei a pung zel bawk. Mizoramah lirthei hi a pung a ni mai lo a, a pung thur thur a ni ber. Tun thlaah pawh lirthei thar sang chuang a awm leh tawh.
Transport department chhinchhiahnaa a lan danin, November ni 17 thlengin lirthei ziahluh thar 1039 a awm leh tawh. Thla liam ta October-ah khan lirthei thar 2815 a awm a, September-ah 2595 a awm.
Kuminah lirthei thar 26177 a awm tawh a, a tam ber chu two wheeler a ni. Two wheeler hi a tam ber a ni mai lo a, a tam fal; kuminah 19885 a awm tawh a, a zatve aia tam fe a ni.
Two wheeler tharah hian transport 190 a awm a, hei hi two wheeler taxi a ni. Three wheeler (transport) 78 a awm bawk a, hei hi auto rickshaw a ni. Car a tam leh a, 3743 a awm.
Lirthei hi a pung chak a, mahse tun hnaiah a punna hi a tlahniam. 2022-ah khan a hma kum aiin za zela 7.45-in lirthei hi a pung a, 2023-ah za zela 6.18-in a pung. 2024-ah za zela 4.55-in a pung a, kum thum chhung chu a tlahniam tawh.
Mizorama lirthei awm zawng zawng hi 4,23,209 tiin an chhinchhiah a, a tam ber chu ke hnih nei chi niin, two wheeler taxi tel lovin two wheeler hi 2,79,100 a awm. Man chawia hman theih chi two wheeler 4121 a awm bawk. Motor car 78,821 a awm a, car hi a tam ber dawttu a ni.
Kumina Mizorama lirthei thar awm zat
Thla Lirthei
January-ah 2403
February-ah 2191
March-ah 2569
April-ah 2876
May-ah 2539
June-ah 2333
July-ah 2515
August-ah 2302
September-ah 2595
October-ah 2815
November-ah 1039