Tunhnaia Mizoram taekwondo chetvelna hrang hrang lawrkhawm

Tunhnaia Mizoram taekwondo
chetvelna hrang hrang lawrkhawm
Karliamta khan Mizoram Amateur Taekwondo association (MATA) chuan press meet koin tunhnaia Mizoram taekwondo chetvelna an tlangzarh a; he hun hi MATA president Prof. Rualkhuma Colney-in kaihruaiin, MATA general secretary Master Joseph Thansanga’n MATA hmalakna leh Honorary Black Belt chungchang sawifiahin, South Korea atanga lo zin Grand Master pahnihte’n an lokal chhan tean sawi a; Master VL Sawma’n lawmthu a; press meet hi MATA OB dangte’n an tawiawm tha hle.
Taekwondo Federation of India (TFI) chuan Taekwondo Poomsae-ah hma a sawn theihna turin World Taekwondo Hqrs. Kukkiwon atangin Grand Master-te a chah ni se tiin a rel a, seminar pekna hmun atan India rama Poomsae thiamna area thlan niin, North East lamah Mizoram leh south/central India lamah Karnataka thlan a ni bawk.
A hun tura ruat hi July thla ni mah se Mizoram Sports Conclave-ah khan Taekwondo Seminar buatsaih tura Mizoram sawrkarin a ngen avangin TFI leh World Taekwondo Hqrs. chuan rem a ti a, a hun an sawnhnai ta a ni.
Mizorama lo kal Grand Master Hee Do Kim kha Kukkiwon professor niin, world champion vawithum lo ni tawh a ni a, taekwondo headquarter-ah nihna pawimawh tak tak a chelh a, 9th Dan Black belt a ni.
Grand Master Lee Jae Ku thung kha International Taekwondo Poomsae leh Kyorugi coaching expert a ni a, India team vawi tam tak lo hrual tawh leh medal engmawzat lo lakpui tawhtu niin, 8th Dan Black belt a ni bawk.
Kukkiwon hian mi bikte hnenah chawimawina a pe thin a, chawimawina hi chi hnihin an then a, ram pum huapa taekwondo promote tha leh tihmasawntu/hmalatu technical mi (black belt) hnenah chawimawina sang ber Letter of Commendation an pe thin a; technical mi ni lo – mihring dikna chanvo humhalh tha te, environment leh mipui tana hna thawk tha ram hruaitute leh infiamnaah (taekwondo) hmasawn tak ram hruaitute hnenah Honorary Black Belt leh Letter of Appreciation an pe thin bawk.
June ni 14, 2024 khan Grand Master-te hian chief minister Lalduhoma hnena Letter of Appreciation leh Honorary Black bbelt 7th Dan an hlan a; Letter of Appreciation hi Lalfak Zuala, IAS (Retd.) hnenah kum 2022 khan hlan a lo ni tawh bawk.
An pek chhan hi Mizoramah taekwondo-in nasa taka hma a sawn vang te, khawvel huap inelnaa Mizo player-te chetthat vangte leh Sawrkar leh MATA thawhhona tha tak a awm vang niin, ram hruaitu lu ber a nih angin Lalduhoma hnenah an hlan a ni. Sports leh taekwondo tihmasawn zel tura a laka beiseina an neih vang a ni bawk.
Letter of Commendation hi Zothanpuia (2002), Joseph Thansanga (2012) leh VL Sawma (2012)-te hnenah hlan an ni tawh bawk.
Honorary Black Belt hi kum 2012 January ni 19 khan kha tih laia chief minister Lal Thanhawla hnenah Kukkiwon aiawhin Master Lee Jeong Hee, General Sports Manager, Korean Embassy to India-in a lo hlan tawh a; Humanitarian leh khawvel kohhran lian ber hotupa Pope Francis hnenah te, ram hruaitu ropui Barak Obama leh Donald Trump te, UN Secretary General Ban Ki-Moon te, Taekwondo Ambassador atana an hman film star Shah Rukh Khan leh midang tam tak an pe tawh bawk a ni.
Mizoram Sports Conclave chhim tur leh National Taekwondo Seminar zirtir tura lo kal Grand Master Prof. Hee Do Kim leh Grand Master Lee Jae Ku-te khan Mizote leh India mipuite hian Olympic player tam zawk medal lak theihna chance kan nei niin an hmu a, sawrkar atanga thlawpna tha leh sum lama player-te vur an nih ngat chuan India-in taekwondo hmangin khawvel a awpbeh theih an rin thu an sawi.
Mizote hi India rama taekwondo thiam ber zinga mi an nih thu tarlang telin, sawrkar leh company-te thlawpna bakah chanchinbu mite thlawpna tha chu chakna a nih bawk thu an sawi.
Grand Master-te hian MATA hnathawh that avangin an hotute hnenah chawimawina an hlan a, chawimawina dawngte chu MATA president Prof. Rualkhuma Colney hnenah Honorary Black Belt an hlan a; World Taekwondo Headquarter Kukkiwon chawimawina sang ber Technical (Black Belt) chu Master leh Master Joseph Thansanga hnenah an hlan.