Tupac Shakur thattu a rinhlelh man

Tupac Shakur thattu a rinhlelh man
A hunlaia khawvela rapper hriathlawh ber, Tupac Shakur thahnaa inhnamhnawih ni a puh, Duane Keith ‘Keefe D’ Davis, kum 60, chu Las Vegas Police ten manin, court-ah hruai a ni a, prosecutor te chuan 1996-a Tupac Shakur thattuah an puh a ni.
Kum 30 dawn a liam hnuah Tupac Shakur tual thihna chu chinfel a ni dawn ta niin a lang a, 2Pac thihnaah hian thulengvak chi hrang hrang a tam hle a ni. September ni 7, 1996 khan Shakur chu Marion ‘Suge’ Knight khalh BMW car-ah chuangin, Las Vegas khawlaiah an leng a, red light-a an din laiin an car bul, passenger side lamah Cadillac rawn dingin, an kap ta thut a, Shakur hi vawi li an kap fuh a, a hliam tuar lovin a thi ta a ni. Shakur hi a thih hian kum 25 mi a ni.
Las Vegas Metropolitan Police Department-a Lt. Jason Johansson chuan press conference-ah, “David hian silai paiin, Cadillac var-ah Terrence Brown, DeAndre Smith leh Orlando Anderson te nen an chuang a. An tlan deuh hnuah David hian a silai chu a hnunglam thu hnenah a pe a. Cadillac chu Suge car passenger side-ah dingin, Suge Knight leh Shakur chu an kap ta nghal a ni,” a ti.
David hi Tupac thahnaa inhnamhnawih mi pali zinga la dam awm chhun a ni a, a tupa Anderson chu silai hmetpuaktu bera rin a ni a, ani hi 1998 khan Los Angeles-a gang in kahnaah a thi tawh a, Brown pawh hi Los Angeles-ah hian 2015 khan kahhlum a ni a, Smith hi 2004 khan natna avangin a lo thi tawh bawk a ni.