Turkey-in Israel nena sumdawnna titawp

Turkey chuan Gaza-ah ‘Mihring tawrhna turu zual zel’ tia sawiin Israel nena an sumdawntawnna tin te a titawp vek.
Turkish trade ministry chuan Israel-in Gaza a ‘harsatna awm hauh lo leh tanpuina mamawh tawk’ pek luh a remtih hma chuan khapna chu kalpui a ni ang a ti bawk.
Israel leh Turkey te hian nikum khan an insumdawntawnna chu $ 7 billion vel lai a ni.
Israel foreign minister chuan Turkish President Recep Tayyip Erdogan chu ‘dictator’ anga chet la tiin a sawisel thung a.
Israel Katz chuan Erdogan chuan ‘Turkish mipuite leh sumdawng te bakah international trade agreement te chu engahmah a ngai lo’ tiin a sawi a.
Hei bakah hian foreign ministry chu local production te hralhna tur leh ram dang atanga chawkluh dan tur kawng dang te ngaihtuah tura a tih thu a sawi bawk a.
Thuchhuah a siamah Turkey thung chuan ‘product tinah’ tiin Israel nena sumdawnna a khap bur thu a sawi thung a.
“Turkey chuan Israeli sorkarin Gaza a humanitarian aid harsatna awm lova a luh a remtih hma chuan khapna khauh takin a kalpui bur ang,” tiin a sawi.
Kum 1949 khan Turkey chu Muslim-majority ram zinga Israel ram anga pawm hmasa ber a ni a. Mahse, tun hnaiah ram pahnih inlaichinna chuan chhiat lam a pan mek zel a ni.
Kum 2010 khan Turkey chuan Turkish lawnga chuanga Gaza Strip-a Israel maritime border paltlang tum pro-Palestinian Turkish activist te leh Israel commando te inbeihnaah pro-Palestinian Turkish activists 10 tihhlum an nih avangin Israel nena diplomacy lama inzawmna a chhu chat a.
Kum 2016 khan an inkar a pangngai angin an kalpui leh a, mahse, a hnu kum hnih lekah Gaza-Israel border a Israel in Palestinian te a kahhlum avanga buaina thlen hnuah an ram ambassador te an inhnawhchhuahsak leh ve ve a ni.
Nikum 7 October a Hamas tena Israel an beih hnua Israel-in a chhanlet hnuah Erdogan chuan Israel chu nasa takin a sawisel zui zel a ni.
Israeli Prime Minister Benjamin Netanyahu chu Adolf Hitler, Benito Mussolini, leh Joseph Stalin te nen khaikhinin ‘Butcher of Gaza’ a ti bawk.
Netanyahu chuan Turkey leader chu Israel laka morality sawi tura a hnuhnung ber a ni a ti thung a. March thla khan President Erdogan chuan ‘Tualthattu leh pawngsualtu Hamas te thlawp a, a ram chhung ngeiah Armenian leh Kurds te a suat a ni’ a ti ve thung.
Turkey ram chhungah Erdogan chu thla tam tak politics lama a hmelma leh thawhpui te atang pawhin Israel laka hma la turin nawrna a tawk reng tawh bawk a.
March thla tawp lam khan an party rorel lai AK party te chuan kum sawm hnih chhunga local election-a an chak loh ber an tawk bawk a, religious voters tam tak t chuan Islamist New Welfare party, Israel laka khauh taka chetlak tum te chu an vote zawk a ni.
A hma pawhin Turkey chuan Israel hnenah product 54 lai iron leh steel atanga jet fuel, pesticides leh construction equipment te thlengin thawn luh a lo khap tawh bawk.
Ankara-ah trade ministry chuan tunah chuan Israel lakah export leh import an khap bur vek tiin a sawi a. Kum 2023 khan Israel chu Turkey export market lian ber 13 na a ni a, Israel chu a import tamna ber pangana a ni thung.
Gaza Strip dinhmun avangin Israel chuan tunhnaiah sawiselna a tawk nasa a. Thla kalta khan UN thlawp zirchianna chuan Gaza a cheng maktaduai 1.1 te chu an tam lo chauh tawh tia sawiin May thlaah chuan northern Gaza chuan tam a tawk dawn an ti.
Ningani khan White House chuan US sipai tena tanpuina thawnluhna tur lawngchawlhna lailawk an siam chu hawn a ni thuai dawn a ti tung a.
Heng bungrua phurhluhna tur hi US Navy Ship tena an sak mek niin peihfela hman theih lek lekin a awm tawh a. Mahse, UN chuan maritime corridor chu leilunga tanpuina pek luh chu a tluk thei ngai dawn lo va, thil lian tham tak tak supply thil chu land routes mamawh a ni a ti.
Khawthlang ram tena an nawrna nasa tak karah tunkar tir lam khan Israel chuan northern Gaza strip a aid convoy luh thieh nan Erez Crossing chu a hawng tawh bawk a ni.
Mahse, Jordan chuan Erez Crossing an thlen hmain aid lorries thenkhatte chu a chhehvela cheng Israel ten an bei tiin a sawi thung.
UN thlawpa zirchianna neihah Gaza chuan mihring te thlen chhiatna rapthlak tak a tawk dawn mek an ti bawk a. UN most senior human rights official Volker Turk chuan Israel chuan Gaza indonaah riltamna chu ralthuamah a hmang tia puh theih a ni a ti.
Israel thung chuan tanpuia lut tur a khap loh thu sawiin UN zawk chu Gaza chhunga tanpuina sem darhah a hlawhchham a ti ve thung.