Kumin February 6-a Turkey lirnghing avanga building tam tak tluksawp kaihhnawihah mi 600 chuang chhui chianin an awm mek tiin sorkar thuchuah chuan a tarlang.
Kar kalta Inrinni khan Justice Minister Bekir Bozdag chuan rinhlelh 184 lai an zinga contractor leh property neitute chu manin an awm tawh a ti bawk a.
Lirnghin hma kum tam tak tawhah mithiam te chuan eirukna nasa lutuk leh sorkar policy kalpui avangin building thar tam tak te chu a sak dan a him lo tiin an lo sawi tawh a ni.
Lirnghing avanga Turkey leh Syria a nunna chan chu mi 50,000 an chuang tawh bawk a.
Bozdag chuan kar hnih kalta atang khan investigation nasa zawka an kalpui thu sawiin thuneitute chuan mi 113 manna tur thupek an tichuak tawh tiin a sawi bawk a.
Man zinga langsar tak pakhat chu lirnghinna hmun bul hnai lawk khaw pakhata mayor pawh a tel tiin Turkish media te chuan an tarlang.
Lirnghing avang khan Turkey ah bik building 160,000 a chim a, khuarel chhiatna chu mihring te fimkhur lohna in a ti nasa zuala ngaih a ni.
Opposition leh construction expert te chuan President Recep Tayyip Erdogan administration chu building regulation a tak anga kalpui thei lovah leh chhiatna kaihhnawihah thil dang chuanlam tur dem tur zawngah an puh bawk.
Sorkar policy te chuan building regulation kalha satu contractor te ngaihdamna siamin hei vang hian construction boom a thleng a, chu a thlenna hmun chu lirnghing na tak thlen theihna hmun a ni si an ti a ni.
Erdogan sorkar chuan tihsual an neih thu pawmin mahse chhiatrupna nasa tak thlenga demna tawk tur an ni bik lo an ti thung a. “Hetianga chhiatna nasa te hi a thleng fo va, khuarel ken thil a ni ve pakhat,” tiin tun hnai lawka lirnghinna hmun a tlawhnaah a sawi.
Turkey hian inthlan hmachhawn mai tur niin kum 20 chuang thuneihna a chan tawh hnuah Erdogan dinhmun chu phet viaua ngaih a ni bawk.
Turkey-in lirnghing kaihhnawihah mi 600 chuang man
Get real time updates directly on you device, subscribe now.
Next Post