Turmeric tea

Turmeric chu aieng tihna a ni mai. Aieng hian thatna chi hrang hrang a ngah tih pawh kan hre deuh fur tawh ang, keini pawhin taksa hriselna atana aieng thatna chi hrang hrang te pawh kan rawn tarlang fo tawh. Vitamin, mineral leh nutrient chi hrang hrang a pai hnem a, anti-inflammatory properties a nei bawk. Aieng chu chawhmeh tihhmel mawi nan kan hmang deuh ber a, tun tum chu aieng thingpui thatna ni a Times of India health section-in a tarlan te kan chhuah chhawng e. Aieng thingpui chu siam a harsa lo, aieng thirfiante khat emaw hnih emaw tui no khatah pawlhin, chhuan so bawrh bawrh tur a ni. Duh leh sawhthing, ser leh khawizu te pawh pawlh theih a ni. Kan tui chhuan so chu dah dai deuh ila, in tawh mai tur a ni. Aieng thingpui thatna hrang hrang te chu:
1. IBS tan a tha. Irritable bowel syndrome (IBS) nei tan aieng thingpui in a tha. Aienga curcumin awm hi digestion lama insawina neuh neuh nei tan a tha a, IBS vanga na neih te pawh a tiziaawm thei a, regular taka aieng thingpui in hian IBS patient nunkhua a tinuam sawt thei. Thinthip (heartburn) leh pumpuar nuam lo ti deuh el ul nei thin tan pawh nitin aieng thingpui in a tha.
2. Lung tan a tha. Aienga curcumin awm hi lung tan a tha hle. 2012-a mithiam ten zirchianna an neih atanga an hmuh danin bypass grafting surgery neih hma ni thum chhung leh neih zawh hnu ni nga chhung curcumin gram 4 nitin ei ziah hian heart attack risk 17%-in a tihniam thei a, acute myocardial infarction risk a tihniam thei bawk.
3. Taksain natna a do theihna a tichak. Aieng hian antioxidant leh anti-inflammatory properties a neih avangin taksain natna a do let theihna a tichak thei a, hei vang hian nitin aieng thingpui in a tha hle a ni.
4. Vûng a tiziaawm thei. Aieng hian anti-inflammation properties a neih avangin taksa vûng te a tiziaawm thei a, chuvangin arthritis nei tan a tha. Aienga a awm, curcumin hi arthritis avanga na chhawk theitu a ni bawk.
5. Diabetes tan a tha. Curcumin hian blood glucose level a tihniam thei a, diabetes avanga harsatna dang awm neuh neuh thei risk te pawh a tihniam thei a, chuvangin diabetes patient tan regular tak aieng thingpui in a tha. Nitin aieng thingpui in hian insulin siamchhuaktu pancreas-a beta cell-te hnathawh a titha a, chuvangin diabetes la nei lo tan invenna tha tak a ni bawk.
6. Cancer a veng thei. Aieng a awm, curcumin hi anti-cancer agent a ni a, cancer cell thang tur a dang bet thei. Hei bakah hian a antioxidant properties chuan cancer nena inzawmna nei vûng te pawh a tiziaawm thei. Cancer nei tawh tan pawh curcumin hian chemotherapy hnathawh tanpuiin a tichak thei bawk.