Tute nge endawng tur…?

Central YMA chuan eirukna laka hma la chhunzawm turin sub-hqrs./group/branch te a hriattir a. Hei hi nikuma YMA rorel Inkhawma ‘Eirukna leh hlemhletna a reh theih nan Central YMA-in tun aia chak zawkin hma la rawh se’ tih an rel bawhzuina a ni a. Kut tling lova sum la lut leh thawhchhuah phu lova khawsate endawng thiam ni se, an ti a ni.
Mizoramah hian, sum leh pai, in leh lo, huan lo ram thahnem tak nei, mi hausa tia sawi theih tur hi an tam ta hle a. Heng zinga mi tam tak hi chu mahni thawhchhuah phu lova, kut tling lova sum la lut chunga hausa an nih laiin, thenkhat erawh chu thawhrimna leh chhungkaw hausakna inrochun chhawng zel atanga hausa an ni bawk a. Heng mi hausa chi hnihte hi mipui mimir tan chuan thliar hran thiam a harsa hle ang a, mi hausa zawng zawng ‘hmuh sakhi’ ngawt lah chu thil dik tak a ni thei mai dawn si a.
Tuna court-in eiru nia a finfiah, hremna a pek mekte hi chu YMA-in endawng tur a tih huang chhung ami an ni tih a chiang mai a. Hetih rual hian, an thawh chhuah bak thildang atanga sum peipuinna (source of income) nei tha bawk si lo, an eiru a ni tih finfiahna la awm chiah si lo, thawhchhuah phu lova khawsa thei si hi an awm bawk a. Hengte pawh hi YMA-in ‘endawng thiam ni se’ a tih huang chhunga mi an ni bawk awm e.
A pawl anga ‘eiruk do beihpui’ thlak a nih chuan, ‘endawng’ system piah lamah, a practical-a hmalakna tur tam tak a awm dawn tih a lang nghal a. Endawng tura kan infuih rualin, heng endawng hlawhate pawh hi eiru an nihzia ‘finfiah’ tura hmalak a nih leh si loh chuan, sual vulh lenna kawng khat a ni thei mai dawn a. Case siam a nih a, court thubuaia put luh a nih hian, thil sual tia puhte chunga court-in thutlukna dik a siam theihna tura pawimawh chu witness an ni a. Witness inlan that loh avanga a nihna tur anga rorel theih loh hi a lo awm fo tawh a. Hetiang thilah pawh hian YMA hian a beng a chhit ngun a, diklohna hailan a nih theih nana witness-te tha tichak tura tanlak pawh a pawimawh viau awm e.
A thua inzirtir piah lamah, a taka hmalak theihna awm ang ang (FIR/PIL etc)hmanga nakin hnu thleng pawha ‘example tha’ tih theih tur siam tura tun atanga tan lak hi a pawimawh dawn hle a ni.