Typhoon Bebinca-in Shanghai tibuai hle

Shanghai-a mipui maktaduai tel chu Thawhtanni (September 16, 2024) khan kum 1949 hnua thlipui na berin a nuai avangin inchhungah an tawmim vek a. Thlipui tleh avang hian thingkung tam tak tluin transport a khawih buai nasa hle bawk.
Thawhtanni khan Typhoon Bebinca chuan China eastern coastal area city nuaiin thli chak lam chu 151 kilometres per hour vel niin state media te chuan an tarlang.
Kum 1949-a Typhoon Gloria-in Shanghai a nuai hnua thlipui la na ber a nih thu state broadcaster CCTV chuan a tarlang.
Thawhtanni kha Mid-Autumn Festivel public holiday a nih hrim hrim sa avangin sumdawnna tam tak te khar a ni a, Shanghai khawpuia cheng mihring maktaduai 25 chuang te chu pawn chhuak lo tura thurawn pek an ni.
Shanghai-a flood control headquarter chuan typhoon Benica avang hian hmun hrang hrang atangin tichhiat report an dawn nasat thu an sawi bawk a. City centre a kawngpui pakhat chu thingkung tlu avangin dan pinin a awm bawk.
Shanghai-a airport lian pahnih te chu khar niin thlawhna thlawk lut leh chhuak a awm lo va, ferry services leh train te pawh chawlhtirin an awm bawk.
Highway te pawh khar niin Shanghai khawpui chhunga speed limit pawh 40 km a bituk niin vehicle tlan a awm meuh lo thung.
Thlipuiin a nuai nat bik theih tura ngaih Chongming District a cheng mi sangkua vel te chu hmun himah thiarchhuah an ni tiin thuneitute chuan an sawi bawk a.
Typhoon Bebinca tlawh hma lawk hian typhoon Yagi chuan China lo uai tawhin mi paliin nunna chanin Hainan island a paltlangna lamah mi 95 in hliam an tawrhphah tawh bawk.
Bebinca hian Japan paltlang sa tawhin chumi hnuah central leh southern Philippines te paltlangin mi paruk nuna a la a. Bebinca hian hmarthlang lam la nuai zel dawnin Jiangsu, Zhejiang leh Anhui province ah te ruahsur nasa tak a thlen dawna sawi a ni bawk.