Typhoon Wipha-in Hong Kong nuai, China lut leh

Typhoon Wipha-in Hong Kong nuai, China lut leh
Typhoon Wipha chuan Hong Kong na taka nuaiin thlawhna thlawk a tibuai nasa hle a, Pathianni khan China chhim lam, Guangdong province-a Taishan khawpui a lut veleh ta tih sorkar enkawl CCTV-in a puang.
Hong Kong-ah hian thuneituten typhoon signal sang ber, 10 an tihchhuah hnuah Pathianni tuk atang khan 8-ah an tihniam a. A sang berah hian darkar sarih dawn awmin darkar thum lek chhungin ruah mm 110 chuang a sur hman.
Ruah hi hmar lamah a tam zual niin khawpuia observatory chuan a sawi a, a la sur chhunzawm dawn tih a sawi bawk.
Sorkarin thuchhuah a siamah mi damdawi inah mi 26 enkawl ngaiin an awm a, inhumhimna siamah mi 253 tlan lutin thing tlu 471 a awm bawk tih tar lan a ni.
Asia-a lawngchawlhna hmun lian ber pakhat bul mai, North Point-ah chuan mihring chenna in leh kawngpuiah thliin a len hnawl leh hnawk a tam hle.
Hong Kong-a Airport Authority chuan Pathianni khan thlawhna 500 chuang zin tur an thulhtir tawh a, 400 vel zanah emaw tum tura an tihkhawtlai thu leh khualzin 80,000 vel an buai phah tih an sawi.
China-a Hainan leh Guangdong province-ah pawh inralrinna dar khawn a ni tih sorkar news agency Xinhua chuan a puang a. Shenzhen, Zhuhai leh Macao-ah chuan Pathiannia thlawhna lut leh chhuak tur zawng zawng thulhtir leh tihkhawtlai vek an ni.
An thenawm, khawvela pawisa khelhna hmun lian ber, Macau-ah pawh typhoon signal chu 10 atangin 8-ah an tihniam tawh a, tuipui kam hnaihah tui a lian thei tih erawh la sawiin mi chengte chu pawn chhuak lo turin an ti niin sorkar broadcaster TDM-in a puang.
Hong Kong hian T10 warning signal hi kum 2023 khan Super Typhoon Saola vangin an lo tichhuak tawh.
Hong Kong-a a thawh hnuah Wipha hi China-ah Pathianni tlai dar 05:55 (India-a chawhnu dar 02:25) khan khawmual a kai veleh a, a chakna erawh a hloh nasa tawh hle niin CCTV chuan a tar lang.
Wipha hi Thai tawng niin ‘ropuina, mawina, larna’ tihna niin Philippines leh Taiwan hmun thenkhat a lo nuai tawh bawk.
Typhoon thawk hian Philippines-ah hian fur hun lai a nih avangin ruah a titam zual hle a, mi pahnih chin hriat lohvin an awm niin an ram National Disaster Risk Reduction & Management Council chuan a sawi.
Philippines-ah hian mi 3,70,000 vel tibuaiin mi 43,000 vel sorkarin awm lailawkna tur him a siamah an awm a ngaih phah a. Chenna in 400 chuang atichhe bawk.