UCL – ah Liverpool an chak zel

Thawhleh zan khan UEFA Champions League 2024-25 khelh chhunzawm a ni a, an khelh tawha la chak vek Liverpool an chak nawn leh. An hmahruaina sawh nghet tura Liverpool an chak ruallin EPL club Aston Villa pawhin hnehna an chang bawk. Thawhleh zana UCL result thenkhat kan hrut kual thuak thuak ang.
Liverpool 1-0 Girona
Manager thar Arne Slot hnuaia khel tha, English Premier League leh champions league-a hmahruai kawp mek Liverpool hian Mimualah Spain club Girona an hmachhawn. An len luhna mual Municipal de Montilivi-ah khel tha thawkhat viau mah se goal erawh an thun thei mai bik lo. Inkhel hmuhnawm takah goal lut a awm theih loh reng hnuin Liverpool an che fuh a, penalty an hlawhchhuak. Manchester United leh Everton midfielder hlui Donny van de Beek-an Luis Diaz a tihtluk vanga penalty an hmuh hi minute 63-naah Mohamed Salah chuan awlsam takin a pet goal a, an hmahruaina goal a thun. Salah-a’n champions league-a a goal 46 thun tlinna hmangin Reds hian hnehna an chang a, point thum hlu tak an hmu.
Girona lakah an chak leh tak vangin Liverpool hian khelh 6 an chak zawn ta chiah a, hmahruaitu an nihna an sawh nghet. Reds lian League round bikah khelh hmabak pahnih an la nei chungin top 8 huangah an awm chiang tawh a, last 16 an lut fel der tawh. Reds in last 16 an luh laiin Girona erawh chuan table hnuai lam an luah zui ve thung.
Villa an chak leh ta
Champions League a bul tan tha Aston Villa chuan hnehna an chang ve leh ta a, table-ah hmasawn thar lehin pathumnaah an inhlangkai.
EPL club Aston Villa hi German club lian RB Leipzig hmachhawn turin Red Bull Arena-ah an leng lut. An len luhna mualah bul an tan tha viau a, inkhel tan atanga minute thumna lekah John McGinn chuan hmahruaina goal a thun nghal. Hma takah goal chhuah mah se RB Leipzig an buai thui lova, minute 27-naah Lois Openda goal thun hmanga an si phurh sutin, 1-1 a inhnehtawk chungin chawlhlawk an hmang.
Chawlhlawk hnu lamah Villa an khel tha chhunzawm a, goal hnih an thun belh leh. Villa tan hian Jhon Duran chuan minute 52-naah hma an hruai nawn lehna goal a thun a. RB Leipzig tan Christoph Baumgartner chuan an si phurh sut baw mah se English club tan Ross Barkley chuan minute 85-naah chakna goal a thun zui leh a, last 16 an inhlangkai zui ta a ni. Aston Villa in last 16 an luh laiin RB Leipzig hian chak an la nei ve lo thung a, an tla fel der tawh thung.
Inter an chak lo
Season thara chetha pahnih’ Liverpool leh Aston Villa te an chak laiin last 16 lut chiang nghal thei dinhmuna ding Inter Milan chu German champion Bayer Leverkusen hneh lovin an tlawm. German champion Leverkusen hi an mualah an chak zo lo tawh hle a, Inter Milan laka an goal neih chhun hi minute 90-naa Nordi Mukiele thun a ni. An mualah an chak vangin Leverkusen hian an chunga awm reng Inter Milan hi an lehpel a, pahnihnaah an inhlangkai a, Inter hian palina an la luah zui tho thung.
PSG an chak awlsam
Thawhleh zana inkhel dangah French Ligue 1 champion Paris St-Germain chuan Mimualah 3-0 in hnehna an chang a, awlsam taka mualneitu RB Salzburg hnehin point thum an hmu. PSG tan hian Gonçalo Ramos, Nuno Mendes leh Désiré Doué ten goal khat theuh an thun. Mimualah chak chiang viau mah se PSG hian beisei an phak lova, UCL match ruk an hmachhawn atangin vawi hnih chauh hnehna an la chang.