UCL champion Manchester City

Inrinni zan khan Instanbul-a Ataturk Olympic Stadium-ah UEFA Champions League 2022-23 final khelh a ni a. Premier League champion Manchester City chuan 1-0 a Inter Milan hnehin a vawi khat nan an champion. Champions League-ah an champion vangin Manchester City chu treble champion an ni a, EPL club zingah treble champion thei pahnihna an ni.
Ataturk Olympic Stadium-a mipui 75,000 chuang zet hmaa inkhel Manchester City leh Inter Milan te mual laiah an indang chat tawn a, inkhel class sang pangngai tak ni mah se inkhel hmuhnawm tia sawi hluai tur erawh a ni lo. Rinlawk angin City in ball an chang hnem a, tlarhnung ven thiam leh game pawh muan thiam tak Inter Milan in City an zim tawt zung zunga hmunawl an pe duh lo. Goal thun theihna tur hun tha leh hlauhawm tam lohna inkhelah hian Rodri goal thun hmangin City in hnehna hlu tak an chang.
Final-ah hian champion tura rinkai Manchester City lakah Inter Milan an khel tha viau a, hun rei tak chhung chu awmze nei lovin City tlarhma an siam a, an dang bet. City in hun tha an neih hmasak Erling Haaland pet hlauhawm tak pawh si nghak Onana-a’n tha takin a dansak a, an team a chhanhim. Chawlhlawk hmain City player pawimawh Kevin de Bruyne chu hliam vangin lakchhuah a ni a, Phil Foden-a’n a thlak. Chawlhlawk hmain thin phut zawkna tur hlauhawm dang a awm belh lova, goal awm lovin chawlhlawk an hmang.
Chawlhlawk hnu lamah City an khel tha chhunzawm a, ball chang tam zawk viau mah se goal chhuah hmasa zawkah an tang teuh hle. Defender Manuel Akanji leh si nghak Ederson te inrinthulh vangin Inter Milan tan Lautaro Martinez chuan goal thun theihna hun tha a nei a, Ederson-a’n a dansak hlauh vangin City an him.
He an chesualna hian City a tiharh zawk a ni ber a, na zawkin an khingpuite an nawr chhunzawm nghal. Mawi taka ball an inpek kual hnuah City hian an duh angin hun tha an insiamchhuah mai thei bik lo. Bernardo Silva cross chu Inter Milan player ten an dansak. He ball per hi Spain midfielder Rodri chuan kawh mar tha takin a pet kual lut a, minute 68-naah hmahruaina goal a thun. Rodri goal thun hnu lawk hian City in goal an thun belh leh teuh viau a, tha taka a khalh tlang hnuin Phil Foden chuan si nghak Onana a paltlang zo lo.
Goal chhuah hmasa zawkah an tan vangin Inter Milan in an goal an veng reng thei lova, an mamawh goal thawhchhuah tumin an khingpuite an nawr a, goal pawh an thun teuh thei hle. Federico Dimarco chuan goal bar a tauh per a, ball per let leh hi tauh nawn leh mah se Lukaku a tauh per tlat thung a, vanneihthlak takin City an him hlauh. Uiawm taka an hun tha an hloh hnuin Lukaku chuan goal thun theihna hun tha a nei zawn a, uiawm takin a hlah ve ve. Hnai tak atanga Lukaku tauh chu goal ngei tura ngaih a nih laiin Ederson chuan mak tak maiin a lo dang hman hlauh a, an team a chhanhim nawn leh. Vanneithlak taka an him hram hram vangin City chuan an goal neih chhun an humhin tluan a, champion an chak em emna Champions League-ah ngei an champion ta nge nge a ni.
Manchester City hi English Premier League leh FA Cup-a an champion hnuin Champions League-ah an champion zui leh a, trophy lian pathum lain treble champion a ni. English club zingah treble champion ni thei pahnih chiah an ni a. Chungte chu Manchester khaw club ve ve niin kum 1999-a treble champion Manchester United leh 2023-a treble champion Manchester City te an ni.
Manchester City manager Pep Guardiola hian a club enkawl hmasak FC Barcelona chu kum 2008-09 khan treble champion a lo nihpui tawh a. A club enkawl mek Manchester City chu treble champion a nihpui leh tak vangin manager zingah club pahnih treble champion pui thei hmasa ber a ni a. Champions league-ah vawi thum a champion na hmangin record duhawm tak a siam.
City an champion leh tak vangin EPL club parukte UCL-ah an champion tling ta chiah a. EPL club zingah UCL-a champion tawhte chu Chelsea, Manchester City, Nottingham Forest, Manchester United, Liverpool leh Aston Villaz te an ni a. EPL hi UCL a champion team thawh hnem ber an ni.
Champions League 2022-23-ah khan match 125 khelh niin goal 372 a lut a, inkhel tinah goal 2.98 lut ziah ang a ni. Goal 372 zinga goal 12 hi Erling Haaland thun a ni a, City forward Haaland hi top-scorer a ni. UCL season liam taah khan inkhel tinah entu mi 49,554 zel anga chhut a ni bawk.