Nunes-i’n a kawnghren kalsan

Nunes-i’n a kawnghren kalsan
Pathianni zing khan hlawhtling takin UFC 289 neih a ni a, kawnghren pahnih kawl kawp mek Amanda Nunes chuan hnehna chang mah se a kawnghren kalsanin UFC a chawlhsan thu a puang.
UFC featherweight leh bantamweight champion Nunes hian bantamweight kawnghren hum-him tumin Irene Aldana a hmachhawn a. Fight hmuhnawm takah Nunes hian point 50-44, 50-44 leh 50-43 in hnehna a chang a, a kawnghren a humhim. A kawnghren humhim bawk mah se kum 35 mi Nunes hian a kawnghren kawl lai pahnih kalsanin, UFC A chawlhsan thu a puang zui nghal.
“MMA lamah hian hun i hmang rei tawh lua lo maw tiin ka nuin min zawt thin. Tu khaw hriat lem loh Brazil khaw te takte atangin he hmun hi ka pan a. Naupang te ni chungin ka chhungte kalsan in, champion nih ngei ka lungkham thin. Champion niin ka suangtuah ram atak lo thleng ta hi awih a har hial thin. Tunah chuan ka chawlh a lo hun ve ta. Chak chung ngeia chawlh hi ka tan chawlh dan duhawm ber a ni” tiin UFC a chawlhsan tak thu hi Aldana a hneh hnu lawkah a sawi.
UFC-ah hmeichhe zinga kawnghren pahnih kawl kawp thei hmasa ber Nunes hian kum 2008 atang khan MMA a luhchilh tan a. Kum 15 chhungin fight vawi 28 a hmachhawn a, vawi 25 a chak a, vawi 5 tlawm zawkah a tang. A hneh tawh mi 23 zinga mi 14 zet hi knockout hmanga a hneh a ni a. A hneh tawh zingah a hian a hun laia fighter tha ber ber Cris Cyborg, Ronda Rousey leh Valentina Shevchenko te an tel.
UFC 289-ah hian a elpui lian Julianna Pena nen a vawi thum nan inhmachhawn tura rua-hman a ni a. A khingpui tu Pena hi May thla khan a inhnuhdawh vangin a aiah Irene Aldana a ding ta zawk a, Aldana hi a hneh ta tho a ni.