UCL Last 16 hnuhma langzar

Thawhleh zan leh Nilaini zan khan UEFA Champions League last 16 first leg khelh a ni a, inkhel hmuhnawm tak tak pholan a ni. Inkhel hmuhnawm tak takah hnuhma thar hmuh tur a awm nual a, UCL last 16 first leg-a hnuhma langsar kan hrut kual thuak thuak ang.
Alisson Becker
Nilaini zan khan Liverpool chuan French champion Paris Saint-Germain chu an tualzawlah ngei 1-0 in an va hneh. Liverpool tan hian si nghak Alisson Becker a khel tha tak zet a, save tha zet zet vawi kua ngawt a nei. Alisson hi UCL season kal mekah match khata save ngah ber a ni hial a, fak a hlawh tak zet. Liverpool hian UCL season hnuhnung palinah penalty shootout hmachhawn hnem zual pahnih zingah an tel a. An si nghal Alisson hian save vawi kua nei bawkin Liverpool si nghak zingah UCL-a penalty save tam ber a ni bawk.
Liverpool hian Mimuala French club an hmachhawn tumin chak an harsat thin a, vawi nga ngawt an chak zo lo. Alisson Becker chetthat zarzova PSG lakah an chak tak nawlh vangin French club laka an chak theih loh kaltluang chu a tawp fel ta a ni.
PSG hian an mikhual Liverpool lakah shot vawi 27 zet an nei a. Hetihlai hian Liverpool chuan shot vawi hnih chauh an nei ve thung. Hei hi kum 2003-24 hnu lamah UCL knock-out stage-ah hnehna chang team in shot an neih tlem ber tum a ni hial. Liverpool hian season kal mekah tlawm nei lova khelh 22 zet kal tluang PSG chak tluang lai an tihtawpsak.
Rodrygo & Real Madrid
Thawhleh zan khan Real Madrid chuan Santiago Bernabeu-a an mikhual Atletico Madrid chu 2-1 in an lo hneh. Real Madrid tan hian kum 24 leh ni 54-a upa Rodrygo chuan minute 3:25-na lekah hmahruaina goal a thun. Rodrygo hian UCL-ah goal 25 a thun tling chiah a, UCL-a goal 25 thun tling thei zingah a naupang zual panga zingah a tel a. Amah aia naupang lehzualte chu Erling Haaland, Lionel Messi, Kylian Mbappé leh Raúl González te an ni. Hetihlai hian Rodrygo hi Brazil player zingah UCL-a goal 25 thun tling zinga naupang ber a ni thung. Hei mai bakah hian Rodrygo hi March 2006 hnu lamah El Derbi-a goal thun rang ber a ni.
Real Madrid laka an tlawm tum hian Atletico Madrid tan Jullian Alavarez chuan goal khat a thun. Alvarez hi Atletico Madrid player zingah Santiago Bernabeu-a goal thun zawn thei pathumna a ni a, Diego Forlán leh Antoine Griezmann te nen huang khatah an awm.
An mualah an chak vangin Real Madrid in Atletico Madrid lakah vawi li ngawt chak an neih theih tawh loh chu a tawp ta. Kum 2017-18 khan Atletico Madrid lakah hian vawi nga an chak thei lo zawn tawh a, a chhe lama an record tluk leh thei dinhmunah ding mah se hnehna an chang ta hlauh a ni. La Liga club lian Real Madrid leh Atletico Madrid te hi champions league-ah an intum thei riau a, thawhleh zana an hmachhawn kha vawi 10 an intumna niin ram khat team intum hnem record siam mektu Liverpool leh Chelsea te record an tluk a. English club record hi an lehpel zui thuai dawn nge nge.
FC Barcelona
Nilai zan khan La Liga hmahruaitu FC Barcelona chuan tlem zawk ni chungin Benfica an hneh. Barca hi inelna hrang hrangah tlawm nei lovin khelh 16 chhung an kal tluang ta chiah. An club chanchinah tlawm nei lova an kal tluan rei ber vawi 18 tluk turin game hnih chiah an mamawh tawh. Barca hian Mimuala UCL an khelhah vawi li an chak zawn ta a, hetiang zat Mimuala hnehna an chan tum kum 2014-15 khan an champion nghe nghe a ni.
An muala an tlawm tum hian Benfica hi Barcelona lakah shot vawi 26 nei an nei. Season kal mekah Benfica hi Barcelona laka shot nei tam ber an ni.
Harry Kane
Nilai zan khan Bayern Munich chuan an mikhual Bayer Leverkusen chu 3-0 ngawtin an sawp. German champion Leverkusen an sawp tum hian Harry Kane chuan goal hnih a thun. Kane hian season kal meka inelna hrang hrangah goal 31 a thun tling tawh a, season thum chhung goal 30 chin a thun zawn ta a. Season khata goal 30 chuang a thun tlin hi a vawi sarihna chiah a ni bawk. Kane hian UCL season kal mekah goal 9 a thun tawh a, UCL season khata goal a thun tam ber record awm thin chu a khum fel tawh.
Xabi Alonso enkawl Leverkusen hian an elpui lian Bayern Munich an chai thei viau thin a, Bayern lakah hian tlawm nei lovin vawi ruk zet an kal tluang hman tawh. Bayern lakah tlawm nei lova an kaltluan rei ber tum chu Nilaini zan khan a tawp fel ta thung.
Lautaro Martínez
Argentina leh Inter Milan forward Lautaro Martínez chuan si hnih faia Feyenoord Rotterdam an hneh tumin goal khat a thun. Martinez hian Inter Milan tan UCL-ah goal 18 a thun tling chiah a. Inter Milan tan European Competition a goal thun hnem ber ni thin Sandro Mazzola (17) record a khum a, Inter Milan tan European competition a goal thun hnem ber a ni.
Arsenal
London club lian Arsenal chuan thawhleh zan khan PSV Eindhoven chu an mualah ngei 7-1 ngawtin an va sawp sak. Arsenal hi UCL knockout round-ah bik Mimuala an khingpuite sawp nasa ber an ni a. An club chanchinah champions league last 16 chinah goal sarih an thun vawi khatna a ni tel cheu bawk a, Gunners Puja a fuh rem rem hle.
PSV an sawp tum hian kum 17 leh ni 348 a upa Ethan Nwaneri chuan goal a thun a, ani hi UCL-ah match hnih chhunga goal thun zawn thei naupang ber a ni. Hei bakah hian Champions League knock-out stage-a goal thun thei naupang lamah pathum a ni tel bawka a chungah hian hian Bojan Krkic (17y 217d) leh Jude Bellingham (17y 289d) te an awm. EPL khel thei naupang ber record kawl mektu Nwaneri hi EPL Under 18 player zingah inelna hrang hranga goal kua thun thei pathumna a ni a, Wayne Rooney leh Michael Owen te record a nihrual tel bawk.