Bayern in Leverkusen an sawp

March 5, Nilaini zan khan UEFA Champions League (UCL) Last 16 – first leg khelh chhunzawm a ni a, German club lian pahnihte inkhelah Bayern Munich chuan an mikhual Bayer Leversekusen an sawp. Inkhel dangah La Liga club lian FC Barcelona chuan tlem zawk ni chungin Benfica an hneh ve bawk.
Bayern Munich an vul Champions League last 16-ah La Liga club lian pahnih Real Madrid leh Atletico Madrid te an intum a. German club lian pahnih Bayern Munich leh Bayer Leverkusen te an intum ve bawk. Bayern Munich hian tunhnaia an hneh hleitheih loh Bayer Leverkusen chu 3-0 ngawtin asawp a, quarter-final an hnaih leh zual sauh.
Bayern Munich hian Allianz Arena-a an mikhual Leverkusen lakah bul an tan tha viau a, goal pawh an thun hma hle. Inkhel tan atanga minute kuana lekah goal thun thei tak Harry Kane chuan hmahruaina goal a thun. Hma taka goal thun bawk mah se goal an thun belh lawk thei lo thung. Leverkusen pawhin an si phurh sut tumin tan khawh thin bawk mah se an si phurh sut tur khawpin a tawp an khar tha thei lova, si khat faia hnufual chungin chawlhlawk an hmang.
Chawlhlawk hnu lamah mualneitu Bayern an khel tha chhunzawm a, goal pawh an thun belh leh thuai. Second half tantir, minute 54-na lekah Bayern Munich tan hian Jamal Musiala chuan an goal hnihna a thun a, an hmahruaina a tizau. An elpui lian Bayern Munich lakah si hnih phur tawh Bayer Leverkusen hian goal thun an mamawh hle. Goal thun an mamawh em em chungin an chesual leh tlat thung a, minute 62-na lekah Nordi Mukiele hnawhchhuah a ni. Si hnih phur chunga tlem zawk an nih leh zel vangin Xabi Alonso team te dinhmun a chhe tawh hle.
Dinhmun chhe taka ding tawh Leverkusen hi an chesual nawn leh a, penalty an chawi. Goal hmahruai thuntu Harry Kane chuan penalty hi minute 75-naah a pet goal a, an chakna a nem nghet. Harry Kane goal thun hnuin goal dang a luh belh thei tawh lova, Bayern Munich chuan Bundeliga champion Bayer Leverkusen lakah 3-0 ngawtin hnehna an chang zui ta a ni.
An elpui lian Leverkusen lakah chiang taka an chak vangin Bayern Munich hian quarter-final an hnaih lehzual. Xabi Alonso hnuaiah Leverkusen hian Bayern an chai thei viau a, vawi ruk ngawt tlawm an nei lo va, Bayern lakah tlawm an neih loh tluan rei ber tum a ni nghe nghe. Bayern laka an record tha tak chu nilai zan khan Allianz Arena-ah ngei thaichhitin a awm ta thung.
Thawhleh zana inkhel dangah La Liga hmahruaitu FC Barcelona chuan si khat faiin Benfica an hneh. He inkhelah hian Pau Cubarsí chu minute 22-na lekah hnawhchhuah a ni. Tlem zawk ni reng mah se minute 61-naa Raphinha goal thun hmangin an chak ta tho thung.