uikhur enkawl that 75 zingah Saptui Serkawn tel

Indian sawrkar hnuaia tuihna humhalh kawnga hma latu, Ministry of Jal Shakti (Department of Water Resources) chuan BMS missionary- Sap Upa leh Pu Buanga ten an siam, ‘Saptui’ Serkawn Lunglei ami chu India rama tuihna humhalh leh enkawl tha leh tlo 75 a thlan zingah a telh a. Hemi chungchang tarlanna leh Water Heritage Forthnight kharna inkhawm hi Saptui, Serkawnah November 30 khan neih a ni.
Serkawn Local Council kaihhruaia hun hman hi Lunglei bawrhsap Ramdinliani chuan hmanpuiin, PHED Lunglei WATSAN Circle SE K Zohmingliana’n Saptui water heritage atana thlan a nih dan report pe-in, BCM asst general secretary (Service) Rev R Lalnunzira’n Zosap missionary-ten Saptui an siam dan leh vawiin thlenga enkawl a nih dan a sawi a ni.
Saptui hi kum 1903-a Sap Upa leh Pu Buanga ten Serkawna awmhmun an khuar tan tirh atanga tui tlan bera an neih a ni a. Kum 1907-ah BMS atanga tanpuina Rs.150 sengin tuikhur hi pindan pathuma inthlifim tur leh, a in pawh lungrem leh RCC-a sak hnan a ni. Kum 1920-ah BMS atanga tanpuina Rs.350 hmangin chei leh thuamthat a ni leh a, hemi hnu hian BCM leh Serkawn khawtlangin a tul angin an chei chhunzawm zel a, tun thlengin he tuikhur hi khawtlang mipui hman theih leh chhawr theihin a la awm a, Serkawn khawtlang leh BCM Property Department-in an enkawl mek a ni.