Uisa zawrh tih rem tum dawn

Ui talh leh a sa zawrh tih rem a nih theihna’n State Animal Welfare Board chuan hma a la dawn.
Ui talh leh a sa zawrh tih rem a nih theihna’n State Animal Welfare Board chuan hma a la dawn.
Mizoram State Animal Welfare Board (MSAWB) chu an chairman AH & Vety minister Er Lalrinawma hoin Nilaini khan an thukhawm a. Thurel zingah ui talh leh a sa zawrhna tih tlem a nih theihna’n ‘The Mizoram Animal Slaughter (Amendment) Act 2020’ khauh taka kalpui a, uisa zuar tih remna atan ui talh leh a sa zuar thinte lakah a tul anga complaint thehlut turin MSAWB-in hma la se, tiin an rel.
Local council leh village council hman tlan theih tur ran khuahkhirna dan tha zawk siam turin ‘The Mizoram Animal (Control & Taxation) Act 2014’ zirchian nise; ran thi te phumna tur (common cementry) siam nise, LC leh VC hnenah a tul anga ram dil ni se, an ti.
Neitu nei tawh lo ran vakvaite enkawltu JB Foundation-a ran chhanchhuahte enkawl emaw lachhawng (adoption) duh an awmin inkaihhruaina fel tak a awm theihna turin AH & Vety department-in ‘Prevention of Cruelty to Animal Act 1960’ hnuiah inkaihhruaina (guidelines) fel tak siam se, an ti a. Ran phurh chungchangah ‘The Transport of Animal Rules 1978’ chu khauh zawka kalpui nise, dan bawhchhe lo tura inzirtirna uar zawka kalpuiin, Mizorama kohhran leh pawl hrang hrangah lehkha sem nise, an ti. Heng dan bawhchhiate hrem an nih theihna’n hma la turin JB Foundation hi Board hian a ruat nghal.
Ui inthlahpun tir leh zawrh chungchangah ‘The Prevention of Cruelty to Animals (Dog Breeding and Marketing) Rule 2017’ chu khauh zawka kalpui a, ui inthlahpun tir duh bikte tan MSAWB-ah registration ti turin hma lak nise, an ti a. Ran leh ran, ran leh mihring inkara buaina thleng thinah a tul anga hma lak a nih theihna’n AH&Vety department chu inkaihruaina siam tura tih a ni.
AH&Vety Call Center helpline no. 1962 chu ran leh ramsa tih duhdah tuar an awm a, mipuiin thuneitute hnena an report zung zung theihna’n zawm ve nise, an ti a. Cruelty to Animals Act hnuaiah Police leh Transport department chu zirchian pui tha tiin, zirlaite hnenah pawh zirtirna ni se, an ti.
Mizoram State Animal Welfare Board hi ‘Prevention of Cruelty to Animal Act 1960’ hnuaia din niin, chak zawka hma lak a nih theihna’n AH&Vety directorate-ah Animal Welfare Wing a din leh chhawng a, department hian a theih ang angin hma a la zel a ni.