UK-in Ukraine a thlawp tlat dawn

UK-in Ukraine a thlawp tlat dawn
Sir Keir Starmer-a chuan Downing Street-a an inkawmnaah Volodymyr Zelensky-a chu ‘United Kingdom-in an thlawp tlat’ tih a hrilh.
White House-a US President Donald Trump-a nen an inhauh chiam hnua UK a thlen hnuah Ukrainian president hian prime minister hnenah chu ‘hetiang ram thian tha’ a neih avangin a hlim thu a hrilh ve bawk.
Zelensky leh Sir Keir hian Ukranian sipaite hman tur £ tluklehdingawn 2.26 puktirna tur an ziak a, heng sum hi Russian bungraw khawih chet theih lohva awmte atanga hlep hmanga rulh tur a ni ang.
Prime minister hian Pathianni khan London-ah Russia-Ukraine indona tihtawp dan tur ngaihtuaha European leh Canadian hruaitute intawh khawm a thleng nghal a. Zelensky-a hian King Charles a kawm dawn bawk.
Hruaitu pahnihte hi a hma lawka Washington-a inkawmna boruakin a hliah thui hle.
Tun hnaiah Trump-a sorkar hi Europe himna atana inrawlh loh hret hret a tum nia a lan laiin prime minister hi US leh Europe inzawmna atana leilawna tan tumin a hmanhlel hle.
Trump-a nen an inkawmnaah pawha King-in Trump-a zin tura a sawmna a hlan hmasa ber nghe nghe.
Sir Keir-a hian Ukraine chu inremna a awm theih nana US inrawlh theihna turin a bei zel bawk a. Nasa taka an inhauh hnuah Trump leh Zelensky hi phone-in a be zui ve ve nghe nghe.
Zelensky-a’n Downing Street a tlawh hma lawk pawhin Sir Kier hian Trump-a nen inhau vak mah se Ukrainian hruaitu hi a thlawp tlat zel dawn tih a sawi.
Downing Street-a an inkawm zawhah Zelensky-a hian UK-in a puihnaah lawm thu a sawi a, £ tluklehdingawn 2.26 an puk tur pawh ralthuam atan hman a nih tur thu a sawi bawk.
Pawisa puk tur hi October khan puan a lo ni tawh.
White House a tlawh tuma boruak sa tak a awm hnuah Zelensky-a chuan US nen an inzawmna a la tha reng tih a sawi a. “Inbiakna rorum tak ni mah se kan la thawkho reng a. Inzah leh inhrethiam tawna kan tumte inhrilh tawn kan ngai mai chauh a ni,” a ti.
London-a Pathiannia Sir Keir-a kaihhruaia European hruaitute intawh khawm tur hi Washington-in Ukraine indo tihtawp a tum hnua an intawh khawmna hnuhnung ber a ni.
Trump-a sorkar chuan Russia biain Europe tel lova indo tihtawp a tum a, US president hi Russian thu lenglamah a buai niin an ngai.