UK MP Siddiq-i man theih nan Interpol red notice neih dan dap
UK MP Siddiq-i man theih nan Interpol red notice neih dan dap
Bangladesh-a court chuan British MP leh minister hlui, Tulip Siddiq-i chu an khawpui chhunga mi mal estate project nena inzawm eirukna a awm nia sawi chungchangah Ningani khan Interpol red notice dil turin thuneitute a hriattir.
Court chuan he thupek hi Anti-Corruption Commission (ACC)-in a man theihna tura ram angte puihna dilna a thehluh hnuah a tichhuak a. ACC chuan Siddiq-i hian prime minister hlui, Sheikh Hasina nena an chhungkaw inzawmna chu private company hnena sorkar ram peknaah hamthatna a neih theih nan a hmang niin an puh.
Siddiq-i hi Hasina-i laizawnnu fa a ni a, he thubuaia an puhna hi a dik loh thu a sawi fo tawh a, a hmaa a chunga thutlukna siamte chu ‘miin an phiar leh phuahchawp’ tiin a sawi thin a. British mi a nih thu leh Bangladesh mi a nih loh thu a sawi bawk.
Email-a thuchhuah siam tura ngenna chu a chhang lo va, court thupek hnuhnung ber a chhuah hnuah pawh a hnen atangin chhanna a la awm lo.
Bangladesh court-te chuan Siddiq-i hi eiruk thubuai hrang hrang pathumah kum ruk chhung lung ina tantir turin a hrem tawh a, hengte hi Hasina-i’n thuneihna a chan laia a thuneihna a hman sual nia sawi nen a inzawm vek bawk.
Siddiq-i hian nikum January thla khan Prime Minister Keir Starmer-a kaihhruai Treasury-a economic secretary a nihna atangin a bâng a, Hasina nena an inzawmna avanga politic-a nawrna vang a nih thu a sawi a, thil dik lo tih a neih thu a sawi bawk.
Britain hian Bangladesh nen hian an rama mi an man thawn turin inremna an nei lo. Hasina-i hi kum 2024 khan zirlai kaihhruai mipui helna hmangin paih thlak a ni a, kum 15 chhung a lalna chu a titawp a. Paih thlak a nih hnuah an thenawm, India-ah a tlanchhia a, a la awm reng a. A hnuah Bangladesh court chuan a sorkarin nawrh huaihawtte tharum thawha a beih avangin thi turin a hrem zui.
Hasina-i paih thlak a nih hnuah Nobel Prize dawng tawh, Muhammad Yunus-a chuan sorkar lailawk a kaihruai a,. February 12-a inthlanpui neihah khan Hasina-i eptu ber thin, prime minister hlui ve tho Khaleda Zia-i fapa, Tarique Rahman-a kaihhruai sorkar thar a awm ta a ni.