Ukraine-in van atanga beihna a tawh nasat ber tum tawng
Ukraine-in van atanga beihna a tawh nasat ber tum tawng
President Volodymyr Zelensky-a chuan Ukraine chuan Russia atanga van sang atanga beihna an tawh nasa ber ni an tawng tih sawiin drone 728 leh cruise leh ballistic missile 13 hmangin an khawpui hrang hrang kah a ni tih a sawi.
Zelensky chuan a dem thu a sawi a, “Muanna leh inkahhai a awm theih nana beihna nasa tak a awm leiin he thil hi a thleng a, Russia hian heng hmalakna hi a la hnar zel a ni,” a ti.
Thawhlehni zan zankhuaa beihna a thlen hma lawk khan President Donald Trump chuan US-in Kyiv hnenah ralthuam tam zawk a thawn tur thu a puang a, kar hmasa khan thawn tawh loh tur angin US chanchinbuten an lo chhuah tawh a ni.
Thawhlehni khan US hruaitu hian Russian President Vladimir Putin-a chet dan chu manganthlak a tih thu a sawi bawk.
Ukraine khawchhak lam leh Kyiv chu beih tawk reng a ni a, Ukraine khawi lai mah Russian-te hian an hmaih lo.
Polish ramri atanga km 90 chauhva hla, Lutsk khawpui, sipai leh puihna thil inhlanna khawpui chu Thawhlehni zana beihna avangin a kang nasa hle.
Khawthlang lama Lviv leh Rivne khawpuiah pawh thil puak nasa tak a awm.
Hetih lai hian Russian thuneitute chuan Thawhlehnia Ukrainian-ten drone hmanga ramria Kursk region an beihnaa mi pathum thiin pasarih an hliam niin an sawi a. A hnuah mipa naupang kum nga mi chu a hliam vangin a thi zui niin an sawi.
Russia leh Ukraine hi kuminah vawi hnih an inbe tawh a, a chhunzawm leh hun tur erawh sawi lawk a awm rih lo va. Moscow leh Kyiv hian inbiakna hmangin an buaina chu chin fel theih an beisei ve ve a; mahse, Russia-in February, 2022 atanga a rûn hnuah indo tihtawpna lam an la hawi rih lo zel.
Zelensky-a chuan tun kar hian Rome tlawhin Ukraine Recovery Conference-ah a tel dawn a. Pope Leo leh US palai Keith Kellogg a hmu nghal ang.
European hruaitu tam tak an tel dawn a, an zingah German Chancellor Friederich Merz-a pawh telin ani hian Nilaini khan Ukraine hi boruaka invenna hmanrua pek a tiam.
Hetih lai hian Russia hian nipui thaw mekah Ukraine khawchhak lam a bei na sauh sauh zel a ni.