Ukraine indona titawp turin Macron an Xi tur

French leader Emmanuel Macron chuan Chinese leader Xi Jinping chu Ukraine a Russia indona titawp tura hma la turin a ngen.
“Russia be thei ber i ni tih ka hria a, inremna dawhkan kil tura sawm thei i ni tih ka hria” tiin XI chu Beijing-a an inkawmnaah a hrilh a.
Xi chuan China leh France te chuan khawvela remna leh muanna a awm theih nan ‘theihna leh mawhphruhna an nei’ tiin a sawi ve thung.
Moscow chuan Ukraine beihna an chhunzawm mek zelah ‘inremna awm theih nana thil duhawm a awm lo’ tiin a sawi a.
Macron an Khawthlang ram leh China te inlaichinna in a chhiat vanglai a tawh mek laia China tlawh a thlang hian dem a hlawh hle a, China chuan tun thlengin Russia-in Ukraine a run chu a la dem duh bawk hek lo.
Macron hian ram pahnih sumdawnna tihphuisui tum a ni a. A rualin European Commission chief Usrula von der Leyen pawh tel ve in Chinese leadership kaihhruaina hnuaia sumdawng te inhmuhkhawmna a tel ve tura sawm a ni.
Macron hi Beijing chuan ropui taka lawmna a neih hnuah Xi nen inbiakna nei zuiin hei hi French official te chuan ‘tlang hrak’ leh ‘thian thatna’ rilru nena neih a ni tiin an sawi.
Inbiakna neih zawh hnuah Xi chuan “China chuan peace talk awm se duhin political solution a duh a ni” tia sawiin international community te chu insum se a duh tiin a sawi bawk a.
Ukraine indonaah nuclear hman a ni tur a ni lo tiin a sawi bawk a. A hma lawkin Russia thung chuan Belasur-ah tactical nuclear weapons a dah tur thu a puang a, Belarus hi Nato ram te nena ramri nei reng an ni a.
Macron chuan Ukraine awpa a awm chhung chuan ‘Europe ngelnghet leh ralmuang kan nei ngai dawn lo’ tia sawiin UN Security Council member berin organisation charter a bawhchhia chu vanduaithlak tiin a sawi bawk.
Press conference dangah Eu chief von der Leyen chuan China in Russia hnena ralthuam a pe a nih chuan international law kalh niin EU leh China inlaichinna in a tawrh nasat phah ngei ang tiin a sawi thung a.
Beijing chuan ‘remna leh muanna chauh’ duha hma a lak a beisei thu sawiin Ukrainian leader Volodymyr Zelensky an peace plan a siama an ram atanga Russian sipai te inhnuhdawh vek chu a thlawp tlat thu a sawi bawk.
China pawhin Ukraine indona tihtawp nana peace plan a siam a, mahse, hei hi Khawthlang ram ten an hnawl thung a, China chu Russia thlawp lutukah an chhuah a ni. Mahse, Zelensky chuan ngaihven thungin Xi Jinping nena inbiakna neih a duh thu a sawi a, mahse, chhanletna a la dawng lo thung.
EU chief von der Leyen chuan Xi nena inbiakna an neihah Xi chuan Zelensky nena inbiakna neih a hreh loh thu sawiin mahse a hun leh hmun remchan leh dik hunah a ti tiin a sawi.
Ningani kalta khan Russia chuan China chuan palai hna dik tak thawk turin theihna a neih chu a pawm thu a sawi a. “Mahse, Ukraine-a buaina hi a chingchivet em em a, tun dinhmunah chuan inremna awm theihna awm a awm lo,” tiin Kremlin thupuangtu Dmitry Peskov chuan a sawi a, Russia chuan indona kalpui zui zel loh chu duhthlan tur a nei lo, a ti bawk.