Ukraine puih tumna Hungary dang hmiah

Hungary chuan EU-in Ukraine hnena tanpuina a pek tum $55 billion chu a dang.
“Ukraine hnena sum pek belh tum chu veto a ni,” tiin Hungarian Prime Minister Viktor Orban chuan Brussels a inbiakna neih zawh hnuah a social media-ah a post zui nghal a.
EU leader te chuan Ukraine hnena tanpuina pek tur chungchang chu nakum kumtirah ngaihtuah zui a ni ang, an ti zui bawk.
Ukraine hian Russian forces te a beihletnaah EU leh US funding-ah thuk takin a innghat a.
EU leader ten Ukraine-in EU member nih a dilna ngaihtuah tan tur an tih hnuah leh Moldova pawh ngaihtuah tela Georgia hnenah member nihna pek a remtih thu a puan hnu lawkah Orban hian tanpuina pek a dodalna hi a puang zui a ni.
Hungary hi Ukraine in EU member nih a dilna duh lotu niin mahse member nih dilna erawh a veto lo thung.
Ukraine member nih dilna ngaihtuahna inhmuhkhawm chu Orban an a chhuahsan zui nghal a, leader 26 te chuan a tel lovin an ngaihtuah zui a ni.
European Council president Charles Michel thupuangtu chuan inremna siam a nih thu a puang zui a.
Ukraine President Volodymyr Zelensky chuan EU in Ukraine member nih tumna sawiho leh ngaihtuah a remtihna chu ‘hnehna’ tiin a sawi ve thung a.
Orban an Ukraine hnena tanpuina pek a remtih loh chungchangah Dutch Prime Minister Mark Rutte chuan, “Hun kan la nei a, Ukraine hian sum a la nei tho a ni,” tiin a sawi a.
“Ram 26 ten kan rem ti a” tia sawiin, “Victor Orban, Hungary ten an la remti thei lo va. Nakum kumtirah inremna kan neih theih ka ring a, January thla chuan inremna kan nei thei mai ang,” tiin a sawi.
Ukraine hian US defence package $61 billion a beisei bawk a, hei pawh hi beisei anga awm mai lovin Democrats leh Republican lawmakers te ngaihdan a inang lo bawk.
Ukraine leh a thenawm Moldova te chuan Russia-in February 2022-a Ukraine a run hnuah EU zawm duhin dilna an thehlut a. Nikum June thla khan candidate status an pe tawh a, Georgia erawh khatih lai khan candidate status nei sa tawh a ni.
Zelensky chu EU thutluknaah a lawm hle a, “Hei hi Ukraine tan hnehna a ni a, Europe pum anga hnehna a ni a. He hnehna hian min tiphur ang a, min ti chak zual ang,” tiin a sawi.
Moldovan President Maia Sandu pawhin lawmawm a tih thu sawiin, “Ukraine-in Russia runna laka huaisen taka a dodalna tel lo chuan tun dinhmun hi kan thleng hauh lovang,” tiin a sawi bawk.
White House National Security Adviser Jake Sullivan pawhin EU thutlukna chu ‘chhinchhiahtlak’ tia sawiin Euro-Atlantic aspiration tihhlawhtlin tumna kawnga thil pawimawh tiin a sawi a.
German Chancellor Olaf Scholz pawhin a leader puite chu fakin Ukraine leh Moldova chu ‘European family an ni’ a ti bawk a. Orban an negotiation room a chhuahsan chu Scholz idea tia sawi niin tichuan vote lak theihin a awm theih phah dawn vang zawk tiin diplomat pakhat chuan a sawi.
Hetih lai hian President Vladimir Putin chuan Ukraine chu nuihsawhin Western support a kiam zel a ti a. “Engkim mai freebie anga lakluh a ni a. Mahse, heng freebie te hian tawp chin a nei” tiin a sawi.
EU zawm tuma inbiakna hian kum a daih thei a, hei vang hian tuna thutlukna siam hi Ukraine-in EU member nihna a nei ngei dawn tihna a la ni lo.
EU member ni tur chuan reform tam tak member ni duh ramin a siam a ngai a ni. Mahse, EU executive committee chuan Ukraine chu fak hlein 90% a tihlawhtling der tawh tiin an sawi thung.