July 8- 12 chhunga neih UN Expert Mechanism on the Rights of Indigenous Peoples 17th Session chu Geneva Switzerland-ah Zo Reunification Organisation (ZORO) pawh United Nations Organisation hnuaia tualto hnamte inziahluhna, United Nations Permanent Forum for Indigenous Issues (UNFPII) a affilliated member a nih angin a tel.
ZORO Western Zone president Lalnunfela Chawngthu, KH Vanlalruati (Serchhip) leh Switzerland-a ZORO consultant Lalruatpuii Cira te chu ZORO aiawhin an tel a. July 10 khan thusawina hun pek an nih angin Lalnunfela Chawngthu hian 2023 February atanga Manipur Zofaten buaina an tawh dan a sawi.
Zofate chu an pi leh pu atanga an lo luah tawh an in leh lo atangin um chhuah an ni a, an chenna in bakah Pathian biak in halsak niin, an buaina hian ziaawm lam a pan thei loa, state harsa ve tak Mizoram chuan kan unau, mahni sahimna zawngtu a sang tel chu an lo dawngsawng mek tih a sawi a ni.
Bangladesh leh Myanmar lama Zofate harsatna tawh dan pawh sawiin, Bangladesh-a Chittagong Hill Tracts buaina avangin mi tam tak chuan Mizoramah sahimna an zawng a, hetihlai hian India sipai (Border Security Force) chuan Mizoram-a an lo luh phal loin an hnawtkir thin a. Tunah hian Zofa tam tak chu ramngaw hnuaiah ei tur mumal nei loin sahimna zawngin an vakvai mek tih a sawi.
ZORO palai chuan Myanmar lamah UNDRIP sign-tu zing ami ni chungin India chuan Free Regime Movement tihtawp a tum a, India leh Myanmar ramri hung a tum bawk tih a sawi a. Zofate chu Bangladesh, India leh Myanmar-ah kan cheng a, zalen taka kan inkal pawh theihna chu India-in a nuaibo sak a. Ramri hung leh zalen taka ramri hrul amite inkalpawh theihna tih tawp chu a kalpui tlang a nih chuan British Colonial hunlaia dik lo taka kan ram sawpa min thendarh chu India hian uar sauhin a tih belh tihna a ni dawn tih a sawi a ni.
“Kan ram hi kiltin atangin Bangladesh, Myanmar, India-ah pawh Assam leh Manipur-ah nekchepin kan awm mek a. Kan dinhmun a chhe tial tial a, ram pawh kan chan mek a ni. Ram chungchang leh awmdan tur hi mahnia kan inrel ve hun a thlen ngei kan beisei a, mahnia ro kan inrel theih nan UNO thlawpna kan mamawh a, min thlawp turin kan beisei a ni,” Lalnunfela Chawngthu hian a ti.
UN-a inhmuhkhawmnaah Zofate nekchep dan thlen
Get real time updates directly on you device, subscribe now.
Next Post