Angelina Jolie chuan UN refugee agency tana ambassador a nihna chu a chawlhsan tawh a, chutih rualin raltlan (refugee) te chu a thlah thlam dawn chuang lo a, a hma aia nasa lehzuala raltlan te tanpuina kawng luhchilh a tum zawk niin a sawi.
-- Advertisement --
Jolie hi UNHCR nen 2001 atangin an thawkho tan tawh a, 2012-ah special envoy nihna pek a ni a, celebrity zinga UN-in special envoy a neih hmasak ber a ni nghe nghe. Jolie chuan a Instagram-ah raltlan te tan a dam chhung zawng chu inhman a tum thu tarlangin, “Kum 20 hnuah UN refugee agency nena kan thawh hona ka chawlhsan ta a. UN hnathawh tam tak hi a tha ka ti tak zet a, a bikin emergency relief kaltlanga nunna a chhanhim te hi a ropui ka ti thin. UNHCR-ah hian thawktu mi tha tak tak hlir an ni a, nitin mi tam tak nun an thlak danglam sak a ni.
“Refugee-te hi khawvela ka mi ngaihven ber te an ni a, ka dam chhung chu an tan ke ka pen zel ang. Tunah chuan buainain a nghawngna hmun chenchilh tute pawl nen kan thawk ho tawh dawn a ni,” a ti.
Jolie leh UNHCR hian thuchhuah intawm an siamah UNHCR field mission 60 chuang, ram hrang hrang Yemen leh Burkina Faso pawh telin, a Jolie hnathawh an fak hle a, Jolie chu ‘refugee te dikna chanvo puanzar kawnga mi hneh thei ber te zinga mi’ tiin an sawi hial a ni.
Jolie pawhin UNHCR nena an thawkho thei chu vannei a intih thu sawiin, ambassador nihna chawlhsan mah se raltlante tana inhman zui zel a tum tih sawiin, “Ka theihna zawng zawng kum lo kal leh zel turah pawh raltlan te tanpuinan ka hmang zui zel dawn a ni. Kum 20 chhung UN system nen kan thawhho hnuah tunah chuan a ki danga pen chhuan ve hun tawhin ka hria, refugee-te nen kan inhnaihchilh zawk theih nan local organisation te nena thawhhona kawng kan hawi ta a ni,” a ti.