Union minister-in Mizoram-a BJP a sawrkarnan hma la turin chah

Union minister-in Mizoram-a BJP
a sawrkarnan hma la turin chah
Mizorama cham mek Union minister of state for Fisheries, Animal Husbandry & Dairying and Panchayati Raj Prof. SP Singh Baghel chuan Thawhtanni khan BJP Mizoram State office a tlawh.
BJP State president Dr K Beichhua, MLA chuan RGM Mission, NLM leh RAS chungchang, ran vulh leh sangha khawi lama tui kuthnathawktute tan tangkai tur thil hrang hrang a sawipui bakah vawk pul hri avanga vawk vulhtute harsatna tawh thin a sawi a. AH & Vety minister a lo nih tawh avangin a ngai pawimawh hle tih a hrilh.
Union MoS hian BJP Mizoram hruaituten a ministry chan hnuaia Mizoram mipui harsatna an sawipui chu lawmawm a tih thu leh an thu thlen hi a tul anga bawhzui sak a tiam tih a sawi a. A tul anga New Delhi lamah pawh lo bawhzui ve turin a chah.
State party hruaitute chu Mizoram mipui tana ngaihtuahna seng zel tur leh mitinin an chanvo an chan theihna tana theihtawpa hma la zel turin a fuih a. Prime minister Modi-a’n state hnufual zawk leh dawmkan ngaite dinhmun a hriatthiam pui avangin Union minister-te pawh a bik takin Mizoram ngaihven tura tih an ni tih a sawi a ni.
Mizoram harsatna sutkian a nih theihnan a tam thei ang ber tlawh tura tih an ni a. Union minister hrang hrang pawhin Mizoram an lo tlawh thin reng a ni, tiin, Mizoram-in BJP sawrkar a neih ve thuai theihnan theihtawp chhuah zel turin a chah tih a sawi bawk.