Union minister-in Mizoram lui pathuma HEP Plant siam tumna bawhzui pui tum

Union minister-in Mizoram lui pathuma
HEP Plant siam tumna bawhzui pui tum
Union Power minister Manohar Lal Khattar chuan Mizorama lui pathum – Tlawng, Tuivai leh Chhimtuipuia Hydro Electric Power Plant siamna atana ruahmanna kalpui dan tur chu Power & Electricity minister F Rodingliana nen Delhi-ah sawizui pui a tum tih a sawi.
Union minister for Power leh Housing and Urban Affairs Manohar Lal Khattar kaihhruai hian May 29 khan Aizawlah ‘State Review Meeting of Power and Housing & Urban Affairs Mizoram’ neih a ni a. UD&PA minister K Sapdanga leh P&E minister F Rodingliana bakah department pahnih hotute an tel.
Kawphetha hman man khawn chungchanga harsatna awm chu zirchiang a, kim taka khawn chhuah a nih theihnan a tul anga hma la turin P&E department a chah a. Smart meter vuah kawngah sawrkar building leh sumdawnna hmun lian atanga kalpui tan a pawimawh, tiin, kawphetha hman man tha taka khawn chhuah a nih theihnan pre-paid kalpuinaah ‘security deposit’ tih tel a tul tih a sawi a ni.
Kawphetha chu ram hmasawnna tura hmanraw pawimawh a nih angin, renchem thiam leh siam chhuah kawngah ruahmanna tha neih a tul tih Union minister hian a sawi a. Nizung hmanga kawphetha siam chhuah uar deuh deuh turin department-a hotute a chah.
Thutkhawmah hian Mizoram kawlphetha dinhmun sawiho niin, Revamped Distribution Sector Scheme (RDSS) hnuaiah state grid tihchak hna kalpui mek a ni a. Chu’ng hmalakna chuan smart meter vuah tura bituk zat 292081 zinga 52886 vuah tawh niin, hei hi zaa 18.01 a ni. Prepaid meter conversion programme chu P&E department office atangin bul tan a ni a ni a. Standard Operating Procedure tihfel a ni tep tawh a, hemi hnu hian prepaid hmang hmasa apiang tan 2% rebate pek tel a ni dawn tih sawi a ni.
Thuthar thehdarhtute a kawmnaah Manohar Lal chuan, Swacch Bharat Mission kum 10 kalpui a ni tawh a, chumi chhung chuan Mizoram chuan Open Defecation Free piahlamah ODF + dinhmun a luah mek tih a sawi a. Bawlhhlawh sawngbawl kawnga sawt zawka hma lak dan tur sawiho a ni tih a sawi. Khawpui vawnfai, bawlhhlawh thliarhran leh fai leh thianghlim kawnga hma kan sawnna zel theihnan sawrkar laipui atangin puih an inhuam reng tih a sawi bawk.
An inkawmnaah chief minister Lalduhoma chuan, Delhi-a a lo sawipui tawh thin Darzo Lui Pump Storage Project chungchang, Mizoram-in power evacuation line a mamawh belh dan, RDSS hnuaia hmalak mek, rooftop solar installation lama hmalakna a sawipui. A enkawl ministry hnuaia 10% GBS hmanga Mizorama hma la turin a lo ngen. Ministry of Housing & Urban Affairs atanga Thenzawl Peace City dinna tur bultanna, master plan thawhna atan sum a pek avangin lawmthu a hrilh a. Tluang taka hma lak zel a ni tih a lo hrilh.