Ni hnih chama Mizoram tlawhtu sawrkar laipuia minister of state for Tribal Affairs Renuka Singh Saruta chuan Thawhtanni khan Lungleiah Mara Tribal Girls’ Hostel a hawn hnu in district head of office-te bakah NGO hruaitute a kawm.
District hmasawnna chu head of office-te kutah thui tak a innghat tih Union MoS hian sawiin, hna kalpui danah district mipui hmasawnna leh hamthatna dah pawimawh hmasa thin tura chahin sawrkar laipui scheme-te pawh zirchiang a, mipui hmasawnna tura hmang tangkai turin a chah. Sawrkar laipuiin tribal-te hmasawnna turin scheme tha tak tak a duan thu sawiin tribal-te thil siamchhuah hralh leh ram pawnlama thawnchhuah kawngah pawh tan lak zel a ni tih a sawi.
Mizorama self help group, pawl dangte leh mimal thil siam pawh zau zawka hralhchhuah an nih theihna’n department thawktute chu rilru senga, sawrkar laipuiah ruahmanna leh mamawhte thlen turin a chah a. Ministry-in an mamawhte tih hlawhtlin sak a inhuam tih a sawi a ni. Lunglei district chu international border awmna, Bangladesh nena ramri intawm a nih avangin district officials, ramri hnaiha khaw awmte leh a bikin ramria duty sipaite chu boruak tha siam zel tura hma la turin a chah bawk.
Thutkhawmah hian Lunglei district bawrhsap Ramdinliani chuan district chanchin, dinhmun leh hmasawnna hna thawhte a sawi a. Department hrang hrang hnuaia centrally sponsored schemes kalpui mekte dinhmun a sawi a ni.
Union MoS Renuka Singh Saruta hian tlawmngai pawl hrang hrang hruaitute leh khawtlang hruaitute a kawm a. An hmalakna, mamawh leh ram hmasawnna tura an thil vei zawngte a sawipui a ni.
Union MoS-in HoO leh NGO kawm
Get real time updates directly on you device, subscribe now.
Next Post