College of Veterinary Sciences & Animal Husbandry Selesih-ah Bio Safety Level-II Laboratory (BSL-II) leh Mushroom Spawn (Seed) Production Unit chu Union Minister of State for Agriculture & Farmers’ Welfare Shobha Karandlaje chuan Nilaini khan a hawng.
Union MoS chuan India rama chengte ei leh bar hnianghnar taka kan la intodelh thei lo chu veiawm a tih thu a sawi a. Mizoram chu mihring cheng an la tam loh avangin ei leh bara intodelh tura tan lak a harsat a rin loh thu a sawi.
Prime minister-in loneitute a ngaipawimawh a, an hmasawnna tur scheme tam tak ruahman a ni, tiin, a bikin sawrkarin kuthnathawktute tana ruahmanna a siamte ngaihven turin a chah. Champhai a tlawhnaah PM Kisan Scheme hnuaia loneitute a kawmnaah an hamthatna tura sawrkar scheme hrang hrang an hriat loh zia a hmuhin pawi a tih thu a sawi a, sawrkarin an tana ruahmanna leh hamthatna chi hrang hrang a siamte chu ngaihven a, chhawr tangkai turin a chah.
Vety College zirlaite chu an thiamna zirchhuahte chuan kuthnathawktute hnen a thlen loh a, kuthnathawktuten hmasawnna atan an hman loh chuan awmzia a awm dawn lo tih sawiin, kuthna-thawktute hnen thleng pha ngei thiamna leh inpekna zirchhuak turin a chah a ni.
Agriculture minister C Lalrinsanga pawhin Central Agriculture University Imphal hnuaiah Mizoramah Horticulture College Thenzawl leh College of VS&AH Selesih din chu kawng hrang hrangin Mizoramin hma a sawnpui tih a sawi a. BSL-II leh Mushroom Spawn (Seed) Production Unit chu Mizoramin thlai, thei rah leh ranvulh lama hmasawnna leh malsawmna thar thlentu a nih ngei a beisei tih a sawi.
Union MoS hian Ministry of Agriculture hnuaia RKVY- RAFTAAR start-up fund mi pali hnenah 1st installment Rs. 4,00,000 theuh a sem nghal a. Vety College-a KVK-in exhibition an buatsaih chu tlawhin, loneitute leh ran vulhtute nen an inkawm a ni.
Union MoS-in Vety College ah BSL-II Laboratory hawng
Get real time updates directly on you device, subscribe now.
Next Post