Unit hranin airport security dah duh

Unit hranin airport security dah duh
Mizoram Police Service Association chuan airport security chu unit hrana dah ve tawh an duh tih an sawi.
Zirtawpni khan Mizoram Police Service Association (MPSA) hian general conference tum 13-na an hmang a. An thurel zingah – airport security chu Bureau of Civil Aviation and Security dan angin, Airport Security Unit chu SP Security hnuai ni tawh loin, Unit hran ni ve tawh se, an ti a. MPS duty post atan Director General, Prison (IGP level) sawrkarin siam tura dil nise, an ti bawk.
Inkhawmpui hmanpuitu chief minister Zoramthanga chuan police-ten inpe taka hna an thawhnaah lawmthu a sawi a. Mizoramin hun khirh tak a tawn – Covid hrileng, ramri buaina leh kawng hrang hrangah police-in tlin taka hna an hlen thin chu chhuanawm a tih thu a sawi. Police department leh department dangah pawh thawktu indaihlohna leh inthuamthat mamawhna an neih chu a hriatpui tih sawiin, sawrkar sum dinhmunin a zir tawk loh vangin a vaia tihhlawhlin theih rih loh mah se, ngaihtuah zui zel a nih tur thu a sawi a ni.
Hmanpuitu dang Home minister Lalchamliana chuan, mipui rawngbawl hna tha tak taka an thawh thin avangin MPS officer-te chungah lawmthu a sawi a. Hmasawn zel tur erawh an ni, tiin, discipline vawn kawngah tan la zui zelin, hriselna ngaipawimawh a tul tih a sawi. Police-te chu mahni thawhchhuah ni lo sum leh pai it na laka fihlim zel turin a chah a. Police tihchaka thuamthat chu sawrkarin a ngaihpawimawh thu sawiin, tunah sum lama indaih tawk lohna awm mah se, a tul anga hma lak zel a nih tur thu a sawi a ni.