United-ah Nistelrooy kirleh

Player a nih laia goal 150 zet a thunsakna Manchester United-ah khan Ruud van Nistelrooy a kirleh a, mahse, tuntum chu goal thun tur ni loin manager Erik ten Hag-a thachhangdawltu (assistant) pakhat ni turin a ni ta thung.
Football khelh a bansan hnua coaching lam luhchilha an ram club lian PSV Eindhoven pawh lo enkawl tawh Nistelrooy hian May 2023 tleng kha PSV lamah hun hmangin, season thar atan Old Traffod lamin an coaching staff an siksawi a, lut thar zinga Dutch striker hlui pawh hi telin, kum 2001 atanga chhiar tana season nga chhung hlawhtling zeta a inkhelh tawna club-ah coaching lam a buaipui zui dawn ta a ni.
Dutchman hi United player awm tawh zinga goal khung hnem pangana tlingin, Old Trafford a chhuahsan dan erawh kha chu duhthusam a ni ta chiah lo a, khatih laia an boss Sir Alex Ferguson nen khan an thu a inhmu ta chiah lo a, lawm chunga chhuak a ni hran lo!
PSV Eindhoven manager a nih chhung khan Dutch Cup lakpui hman mah se a coaching method-ah player-te an hlim thei meuh lo a, 2022-23 season tawp hma chiahin a ch huak ta a ni.
Kum 48-a upa ni ve tawh Nistelrooy bakah Go Ahead Eagles boss nihna kalsantu Rene Hake pawh United assistant manager hna chelh turin lakthar a ni ve bawk.
Assistant thar pahnih hi kum 2026 thleng daih tur contract ziahpui ve ve niin, heti kum thleng cham zui turin Ten Hag pawhin United-ah a contract a pawtsei hlimhlawt ve bawk.